ഇസ്ലാമിലും കമ്മ്യൂണിസത്തിലും ശാസ്ത്രമുണ്ടോ?; ഷംസീറിനോടും ഗോവിന്ദനോടും ആറ് ചോദ്യങ്ങൾ ഉന്നയിച്ച് ഡോ. കെഎസ് രാധാകൃഷ്ണൻ; പരമതനിന്ദ ഇന്ത്യയിൽ വേണ്ടെന്നും ഫേസ്ബുക്ക് കുറിപ്പ്

തിരുവനന്തപുരം: സ്പീക്കർ എഎൻ ഷംസീർ ഹൈന്ദവ വിശ്വാസത്തെ അവഹേളിച്ച സംഭവത്തിൽ പ്രതികരണവുമായി ബിജെപി നേതാവ് ഡോ. കെഎസ് രാധാകൃഷ്ണൻ. ഷംസീറിനോടും പരാമർശത്തിൽ അദ്ദേഹം മാപ്പ് പറയേണ്ടെന്ന നിലപാട് വ്യക്തമാക്കിയ സിപിഎം സംസ്ഥാന സെക്രട്ടറി എം.വി ഗോവിന്ദനോടും ചില ചോദ്യങ്ങൾ ഉന്നയിച്ചുകൊണ്ടാണ് രാധാകൃഷ്ണൻ രംഗത്ത് വന്നിരിക്കുന്നത്. ഷംസീറിന്റെ പരമതനിന്ദ ഇന്ത്യയിൽ വേണ്ടെന്നും അദ്ദേഹം കൂട്ടിച്ചേർത്തു.

ഫേസ്ബുക്ക് പോസ്റ്റിന്റെ പൂർണ രൂപം

ഇസ്ലാമിലും കമ്മ്യൂണിസത്തിലും ശാസ്ത്രമുണ്ടോ? ഷംസീറിന്റെ പരമതനിന്ദ ഇന്ത്യയിൽ വേണ്ട. ഷംസീറിനോടും ഗോവിന്ദനോടും ആറ് ചോദ്യങ്ങൾ?

ഗണപതി മിത്താണ് എന്ന് പ്രചരിപ്പിച്ചത് ശാസ്ത്ര ബോധം പ്രചരിപ്പിക്കുന്നതിന് വേണ്ടിയാണെന്നാണ് സ്പീക്കർ ഷംസീറും പാർട്ടി സെക്രട്ടറി ഗോവിന്ദനും വിശദീകരിച്ചത്. ഭരണഘടന അനുച്ഛേദം 51 – എ (എച്ച് ) അനുസരിച്ചു ശാസ്ത്രബോധം പ്രചരിപ്പിക്കാൻ തങ്ങൾ ബാധ്യസ്ഥരാണ് എന്നും അവർ അവകാശപ്പെട്ടു. ഭരണഘടനയിലെ നിദ്ദേശക തത്വങ്ങളിൽ ഉൾപ്പെട്ട മൗലിക കടമകളുടെ കൂട്ടത്തിലാണ് ഇത് ഉൾപ്പെടുത്തിയിരിക്കുന്നത്. ഇതേ നിർദ്ദേശക തത്വങ്ങളിലാണ് ഏകീകൃത പൗരനിയമം നടപ്പിലാക്കണം എന്നും നിർദ്ദേശിച്ചിരിക്കുന്നത്. എന്നാൽ ഏകീകൃത പൗരനിയമം നടപ്പിലാക്കരുത് എന്നാണ് ഈ രണ്ടു ഭരണഘടന പ്രേമികളും ആവശ്യപ്പെടുന്നത്. പൗരനിയമത്തിലല്ല ഇസ്ലാമിക വ്യക്തി നിയമത്തിലാണ് ഷംസീറിനു താത്പര്യം. ഗോവിന്ദന്റെ കണ്ണ് മുസ്ലിം വോട്ടിലും.

അതുകൊണ്ടാണ് ശാസ്ത്രത്തിൽ കണ്ണുവെച്ചിരിക്കുന്നത്. ഇവർ അറിയാത്ത കാര്യം ശാസ്ത്രത്തിന്റെ നിർവ്വചനത്തിൽ സംഭവിച്ചിരിക്കുന്ന മാറ്റമാണ്. ഇതിനെയാണ് ശാസ്ത്ര നിർവചനത്തിൽ ‘പാരഡൈം ഷിഫ്റ്റ് ‘ എന്ന് പറയുന്നത്. കേരളത്തിൽ ശാസ്ത്ര സാഹിത്യ പരിഷത് പ്രചരിപ്പിച്ചുകൊണ്ടിരിക്കുന്ന ശാസ്ത്രനിർവ്വചനം പഴംചരക്കാണ്. അത് ഇപ്പോൾ ആരും അംഗീകരിക്കുന്നുമില്ല. മാർക്‌സിസം ശാസ്ത്രമാണെന്ന് ഇന്നും വിശ്വസിക്കുന്ന നിഷ്‌കളങ്കനാണ് ഗോവിന്ദൻ. ഇസ്ലാം ശാസ്ത്ര മതമാണ് എന്ന് വിശ്വസിക്കുന്ന ബുദ്ധിമാനാണ് ഷംസീർ. അതുകൊണ്ടു ഇസ്ലാമിലും കമ്മ്യൂണിസത്തിലും ശാസ്ത്രമുണ്ട് എന്നും രണ്ടു പേരും വിശ്വസിക്കുന്നു.

തന്റെ മതം ശാസ്ത്രമാണ് എന്നും അത് മാത്രമാണ് ശാസ്ത്രമെന്നും അതല്ലാത്തതെല്ലാം അശാസ്ത്രമാണെന്നും വിശ്വസിക്കാൻ ഷംസീറിനു അവകാശമുണ്ട്. എന്നാൽ തന്റെ മതം ഒഴികെയുള്ള മതങ്ങൾ അധമങ്ങളാണ് എന്ന് പറയാൻ അദ്ദേഹത്തിന് അവകാശമില്ല. കാരണം അത് പരമതനിന്ദയാണ്. ഇസ്ലാമിക മതരാഷ്ട്രത്തിലാണ് ഷംസീർ ജീവിക്കുന്നതെങ്കിൽ പരമതനിന്ദ ആവോളം ആകാം. എന്നാൽ ഇന്ത്യയിൽ അത് ശരിയല്ല. ഈ പശ്ചാത്തലത്തിൽ ഗോവിന്ദനോടും ഷംസീറിനോടും ചില ചോദ്യങ്ങൾ ചോദിക്കാതിരിക്കാനാകില്ല.

(1)അള്ളാഹു, മലക്ക്, ചെകുത്താൻ, സ്വർഗം, അന്ത്യവിധി, മരിച്ചവന്റെ ഖബറിനുള്ളിൽ നടക്കുന്ന കുറ്റവിചാരണ ഇവയൊന്നും ലോകത്താരും ഇന്നുവരെ കണ്ടിട്ടില്ല. ഇവയെല്ലാം മിത്താണോ വസ്തുതയാണോ? ഇവയെല്ലാം ശാസ്ത്രീയമാണ് എന്നും നിങ്ങൾ കരുതുന്നുണ്ടോ? ഇവ മിത്താണ് എന്നാണ് ഷംസീർ കരുതുന്നത് എങ്കിൽ ഗണപതിക്ക് പകരം ഉദാഹരണം ഇസ്ലാമിൽ നിന്നാകാമായിരുന്നു.

(2) അസത്യവേദക്കാരായ ബഹുദൈവവിശ്വാസികൾ, ബിംബാരാധകർ, ക്രിസ്ത്യാനികൾ, ജൂദന്മാർ എന്നിവരെ ഇസ്ലാമാക്കി മാറ്റുക എന്നത് ഒരു മുസ്ലിമിന്റെ കടമയാണ്. അതിനെ ജിഹാദ് എന്നാണ് വിശേഷിപ്പിക്കുന്നത്. ജിഹാദിൽ ചത്താലും കൊന്നാലും സ്വർഗം കിട്ടുമെന്നും അങ്ങനെ സ്വർഗത്തിൽ എത്തുന്ന പുരുഷന്മാർക്ക് അള്ളാഹു ഹൂറികളെ നൽകുമെന്നും പറയുന്നു. എന്നാൽ സ്ത്രീകൾക്ക് എന്ത് നൽകുമെന്ന് പറയുന്നുമില്ല. ഇത് ശാസ്ത്രീയമാണ് എന്ന് ഷംസീർ വിശ്വസിക്കുന്നുണ്ടോ?

(3) മരിച്ചു കിടക്കുന്നവന്റെ മൃതശരീരത്തിന് മുന്നിൽ നിന്ന് മുഷ്ടി ചുരുട്ടി മുദ്രാവാക്യം വിളിക്കുന്നത് കമ്മ്യൂണിസ്‌റ് അനുഷ്ഠാനത്തിന്റെ ഭാഗമാണ്. ഗോവിന്ദൻ മാഷേ ഈ അനുഷ്ഠാനം മിത്താണോ ശാസ്ത്രമാണോ?
(4) പാർട്ടിക്കുവേണ്ടി അന്യനെ കൊല്ലുന്നവനെ വിപ്ലവകാരിയെന്നും പാർട്ടിക്കുവേണ്ടി മരിക്കുന്നവനെ രക്തസാക്ഷി എന്നും വിളിക്കുന്നു. ഇതിൽ രക്തസാക്ഷി അമരനാണ് എന്നും അയാൾ മരിക്കാതെ ജീവിക്കുന്നുണ്ട് എന്നും പറയുന്നു. ഇതിൽ എന്ത് യുക്തിയും ശാസ്ത്രവുമാണ് ഉള്ളത്? മരിച്ചവൻ പിന്നെ ജീവിച്ചിരിക്കുന്നു എന്നതിന് ഒരു തെളിവും ഇന്നേ വരെ കിട്ടിയിട്ടില്ല. എന്നിട്ടും രക്തസാക്ഷി എന്ന് പറഞ്ഞു ആളെ പറ്റിക്കുന്നതാണോ ഗോവിന്ദാ ശാസ്ത്രബോധം?

(5) ഡയലിറ്റിക്കൽ മെറ്റീരിയലിസം എന്ന സിദ്ധാന്തം അർത്ഥ ശൂന്യവും അസംബന്ധവുമായ വിശ്വാസമാണ്. ഡയലറ്റിക്കൽ ആൻഡ് ഹിസ്റ്റോറിക്കൽ മെറ്റീരിയലിസം എന്ന സിദ്ധാന്തമാകട്ടെ മനുഷ്യ വിരുദ്ധവും പ്രകൃതി വിരുദ്ധവുമാണ്. കമ്മ്യൂണിസം എന്നത് മനുഷ്യൻ ഇന്നുവരെ ഒരിടത്തും കണ്ടിട്ടില്ലാത്ത മിത്തുമാണ്. എന്നിട്ടും എന്തിനാണ് ഗോവിന്ദ ഈ പിത്തലാട്ടം?
6) പാർട്ടി യോഗങ്ങൾ നടക്കുമ്പോൾ രക്തസാക്ഷി മണ്ഡപങ്ങൾ പണിയുകയും അതിൽ ര്കതപുഷ്പങ്ങൾ അർപ്പിക്കുകയും ചെയ്യാറുണ്ട്. എന്ത് ശാസ്ത്രയുക്തിയാണ് ഇതിലുള്ളത്?

പാർട്ടിക്കുവേണ്ടി എന്തും ചെയ്യാം എന്ന് നിങ്ങൾ കരുതരുത്. ഇസ്ലാം മതത്തിൽ അടിയുറച്ചു വിശ്വസിക്കുന്ന ഷംസീറിനു മദ്രസ വിദ്യാഭ്യാസത്തിലൂടെ ലഭിച്ച വിശ്വാസം ഉപേക്ഷിക്കാനാകില്ല. പരമതനിന്ദയും അതിന്റെ ഭാഗമാണ്.