സേലം : സൂപ്പര്‍ സ്റ്റാര്‍ രജനീകാന്ത് ഒരിടവേളയ്ക്ക് ശേഷം ബിഗ് സ്‌ക്രീനിലെത്തിയ ജെയ്‌ലര്‍ തീയേറ്ററുകളില്‍ തരംഗമായി മാറി. ആദ്യ ദിനം 95 കോടി രൂപയാണ് ചിത്രം നേടിയത്. ഇന്ത്യയില്‍ മാത്രം 65 കോടി ജെയ്‌ലര്‍ കളക്ഷന്‍ ചിത്രത്തിന് ലഭിച്ചു. കേരളത്തില്‍ നിന്ന് മാത്രം 6 കോടി വാരിയാണ് ചിത്രം വമ്പന്‍ ഹിറ്റായി മാറിയത്. തമിഴ്‌നാട്ടില്‍ 900 തീയേറ്ററുകളിലും കേരളത്തില്‍ 300ന് മുകളില്‍ തിയേറ്ററുകളിലാണ് ചിത്രം റിലീസിനെത്തിയത്. ഇതോടെ ഈ വര്‍ഷം കേരളത്തില്‍ ആദ്യ ദിനം ഏറ്റവുമധികം കളക്ഷന്‍ നേടുന്ന ചിത്രമായ ജെയ്‌ലര്‍ മാറി.
തമിഴ് നാട്ടില്‍ നിന്ന് 29 കോടി ചിത്രം നേടിയപ്പോള്‍ 11.92 കോടിയോളമാണ് കര്‍ണാടകയില്‍ നിന്ന് ലഭിച്ചത്. ട്രേഡ് അനലിസ്റ്റ് മനോബല വിജയബാലന്റെ കണക്കുകള്‍ പ്രകാരം തമിഴ്‌നാട് 29 കോടി, ആന്ധ്രപ്രദേശ് – തെലങ്കാന 12 കോടി, കര്‍ണാടക 11.92 കോടി, കേരളം 5.38 കോടി, ബാക്കി സംസ്ഥാനങ്ങളില്‍ നിന്നായി 4.23 കോടി, വിദേശ രാജ്യങ്ങളില്‍ നിന്ന് 32.75 കോടി എന്നിങ്ങനെ മുഴുവന്‍ 95 കോടിയാണ് ജെയ്‌ലറിന്റെ ആദ്യ ദിന കളക്ഷന്‍. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനാണ് ചിത്രം കേരളത്തില്‍ വിതരണത്തിനെത്തിച്ചത്.
സൂപ്പര്‍ താരങ്ങളായ രജനീകാന്തും മോഹന്‍ലാലും ഒരുമിക്കുന്നു എന്നതാണ് ചിത്രത്തിന്റെ പ്രത്യേകത. ആരാധകര്‍ക്ക് ആഘോഷമാക്കാനുള്ള വിരുന്ന് ചിത്രത്തില്‍ ആവോളമുണ്ടെന്നാണ് വരുന്ന ആദ്യ റിപ്പോര്‍ട്ടുകള്‍. ടൈഗര്‍ മുത്തുവേല്‍ പാണ്ഡ്യനായി രജനീകാന്തും എന്ന മാത്യൂസ് അധോലോക നായകനായി മോഹന്‍ലാലും ചിത്രത്തില്‍ അഴിഞ്ഞാടുകയാണെന്ന് റിവ്യൂകള്‍ പറയുന്നു. അനിരുദ്ധാണ് സംഗീതം നല്‍കിയിരിക്കുന്നത്. തമന്ന, രമ്യ കൃഷ്ണന്‍, വിനായകന്‍, ശിവ്രാജ് കുമാര്‍, ജാക്കി ഷ്‌റോഫ്, സുനില്‍ തുടങ്ങി നിരവധി താരങ്ങള്‍ ചിത്രത്തിന് അണിനിരക്കുന്നു.
Discussion about this post