ന്യൂഡല്ഹി : നമ്മുടെ രാജ്യം വികസിക്കുന്നത് സ്ത്രീകളുടെ നേതൃത്വത്തിലൂടെയാണെന്ന് പ്രധാനമന്ത്രി നരേന്ദ്ര മോദി. 77ാമത് സ്വാതന്ത്ര്യദിനത്തില് രാജ്യത്തെ അഭിസംബോധന ചെയ്യവേയാണ് പ്രധാനമന്ത്രി സ്ത്രീകളുടെ പ്രയത്നത്തേയും കഴിവുകളേയും പ്രശംസിച്ചത്. വനിതാ ശാസ്ത്രജ്ഞരാണ് രാജ്യത്തിന്റെ അഭിമാനമായി മാറിക്കൊണ്ടിരിക്കുന്ന ചന്ദ്രയാന് ദൗത്യത്തിന് നേതൃത്വം നല്കുന്നതെന്നും പ്രധാനമന്ത്രി ഓര്മ്മിപ്പിച്ചു.
‘ സ്ത്രീകളുടെ നേതൃത്വമാണ് രാജ്യത്തെ വികസനത്തിലേക്ക് നയിക്കുന്നത്. ഞാന് വളരെ അഭിമാനത്തേട് കൂടി തന്നെ പറയാന് ആഗ്രഹിക്കുന്നു സിവില് ഏവിയേഷന് വിഭാഗത്തില് ഏറ്റവും കൂടുതല് പൈലറ്റുമാര് ഉള്ളത് ഇന്ത്യയിലാണെന്ന്. ചന്ദ്രയാന് ദൗത്യത്തിന് പിന്നിലും സ്ത്രീ ശാസ്ത്രജ്ഞരാണ്്’, മോദി പറഞ്ഞു. സ്ത്രീകള് നേതൃത്വം നല്കുന്ന വികസന പ്രവര്ത്തനങ്ങളുടെ പ്രാധാന്യം ജി 20 രാജ്യങ്ങള് മനസ്സിലാക്കി വരികയാണെന്നും പ്രധാനമന്ത്രി ചൂണ്ടിക്കാട്ടി. ഇത്തരത്തിലൊരു തിരിച്ചറിവ് ലോക രാജ്യങ്ങളുടെ മുന്നിലേക്ക് എത്തിക്കാന് കഴിഞ്ഞതില് നമുക്ക് ഏറെ അഭിമാനിക്കാവുന്നതാണെന്നും അദ്ദേഹം കൂട്ടിച്ചേര്ത്തു.
കൂടാതെ ബഹിരാകാശം മുതല് സമുദ്രത്തിന്റെ അടിത്തട്ട് വരെയുള്ള വിഷയങ്ങള് രാജ്യം അതിവേഗം പുരോഗതി കൈവരിക്കുകയാണെന്നും പ്രധാനമന്ത്രി ചൂണ്ടിക്കാട്ടി. നമ്മള് ആധുനികവത്കരണത്തിന്റെ പാതയില് ദ്രുതഗതിയില് മുന്നേറുകയാണ്. ടെക്നേളജിയിലും, എഞ്ചിനീയറിംഗ് മേഖലകളിലും ഗണിതശാസ്ത്ര മേഖലകളിലുമടക്കം ഇന്ത്യയിലെ പെണ്കുട്ടികള് ആണ്കുട്ടികളേക്കാള് മുന്നേറുകയാണ്. അവരുടെ ഉന്നമനമാണ് രാജ്യത്തിന്റെ ലക്ഷ്യമെന്നും ഭാരതത്തിന്റെ വിദ്യാര്ഥികള്ക്കായി എല്ലാ ഗ്രാമങ്ങളിലും ഇന്റര്നെറ്റ് ലഭ്യത ഉറപ്പാക്കുമെന്നും അദ്ദേഹം പറഞ്ഞു.
Discussion about this post