വിജയവാഡ : ആന്ധ്രപ്രദേശിലെ പുലിവെണ്ടുല മികച്ച വാഴപ്പഴങ്ങൾക്ക് വളരെ പ്രശസ്തമാണ്. പുലിവെണ്ടുല വാഴപ്പഴങ്ങൾ ആന്ധ്രപ്രദേശിലും ഉത്തരേന്ത്യൻ സംസ്ഥാനങ്ങളിലും ഏറെ പ്രചാരത്തിലുള്ള ഒന്നാണ്. ഇപ്പോൾ പുലിവെണ്ടുലയിലെ വാഴകൃഷി പ്രോത്സാഹിപ്പിക്കാനുള്ള ഒരുക്കത്തിലാണ് കേന്ദ്രസർക്കാർ. അതിന്റെ ഭാഗമായി പുലിവെണ്ടുലയിൽ 4.82 കോടി ചെലവിൽ വാഴകൃഷി-പഴ സംസ്കരണ യൂണിറ്റ് ആരംഭിക്കുന്നതിനായുള്ള പദ്ധതിയാണ് ആവിഷ്കരിച്ചിരിക്കുന്നത്.
കർഷകരുടെ വരുമാനം വർധിപ്പിക്കുന്നതിനായി വാഴയിൽ നിന്നുള്ള അസംസ്കൃത വസ്തുക്കൾ കാണിച്ചു പരമായി ഉപയോഗിക്കാൻ കഴിയുന്ന രീതിയിൽ പുനർ നിർമ്മിക്കുക എന്നുള്ളത് ഈ പദ്ധതിയുടെ പ്രധാന ലക്ഷ്യങ്ങളിൽ ഒന്നാണ്. അതിനായി വാഴത്തട സംസ്കരിച്ച് ഗ്ലാസ്, പ്ലേറ്റ് എന്നിവ ഉണ്ടാക്കി മാറ്റാൻ പദ്ധതി തയ്യാറാക്കിയിട്ടുണ്ട്. ടിഷ്യൂ കൾച്ചർ, ഡ്രിപ്പ് ഇറിഗേഷൻ തുടങ്ങിയ അത്യാധുനിക സാങ്കേതിക വിദ്യകൾ കൃഷിയിൽ ഉപയോഗിക്കും. ഡൽഹി, പശ്ചിമ ബംഗാൾ, മഹാരാഷ്ട്ര, ഗുജറാത്ത് തുടങ്ങിയ സംസ്ഥാനങ്ങളിലേക്കാണ് പുലിവെണ്ടുല വാഴപ്പഴം കൂടുതലായി കയറ്റുമതി ചെയ്യുന്നത്.
പരമ്പരാഗത വ്യവസായങ്ങളുടെ പുനരുജ്ജീവനത്തിനുള്ള കേന്ദ്രത്തിന്റെ സ്കീം ഓഫ് ഫണ്ടിന്റെ (SFURTI) സാമ്പത്തിക സഹായത്തോടെയാണ് പുതിയ പദ്ധതി ആരംഭിക്കുന്നത്.
പദ്ധതി നടപ്പാക്കുന്നതിനുള്ള നോഡൽ ഏജൻസി എപി ഫുഡ് പ്രോസസിംഗ് സൊസൈറ്റി ആയിരിക്കും. സൊസൈറ്റി ഫോർ ഇന്നൊവേഷൻ ആൻഡ് ഇൻകുബേഷൻ ഡെവലപ്മെന്റ് പദ്ധതിക്ക് സാങ്കേതിക പിന്തുണ നൽകും. ഈ പദ്ധതി നടപ്പിലാക്കുന്നതിനായി ഇതുവരെയായി ഏകദേശം 9.22 ഏക്കർ ഭൂമി ഏറ്റെടുത്തിട്ടുണ്ട്.
Discussion about this post