മുംബൈ: സ്ത്രീസൗഹൃദ വാട്സാപ്പ് ആയ പിങ്ക് വാട്സാപ്പ് ഇൻസ്റ്റാൾ ചെയ്യൂ എന്ന പേരിൽ നിങ്ങളുടെ ഫോണിൽ എന്തെങ്കിലും സന്ദേശങ്ങൾ വന്നിരുന്നോ? ഒരു ആവേശത്തിന് നിങ്ങൾ ചാടിക്കേറി ആപ്പ് പെർമിഷനുകൾ എഗ്രീ ചെയ്ത് സംഗതി ഇൻസ്റ്റാൾ ചെയ്തുവോ? എങ്കിൽ നിങ്ങൾ പെട്ടു. നിങ്ങളെ കാത്തിരിക്കുന്നത് എട്ടിന്റെ പണിയാണ് എന്നാണ് വിദഗ്ധർ നൽകുന്ന മുന്നറിയിപ്പ്.
വാട്സാപ്പ് പിങ്ക് ഒരു നൂതനമായ ഓൺലൈൻ തട്ടിപ്പാണ്. മുംബൈ, കേരള, കർണാടക തുടങ്ങിയ സംസ്ഥാനങ്ങളിൽ നിരവധി പേരാണ് ഇതിനോടകം ഈ തട്ടിപ്പ് ആപ്പിന്റെ കെണിയിൽ കുടുങ്ങിയിരിക്കുന്നത് എന്നാണ് പുറത്ത് വരുന്ന വിവരം. എന്താണ് ഈ പുതിയ ആൻഡ്രോയ്ഡ് തട്ടിപ്പ്, ഇത് നമുക്ക് പണി തരുന്നത് എങ്ങനെ എന്നൊക്കെ നോക്കാം.
പുതിയ ഫീച്ചറുകൾ നൽകുന്ന സ്ത്രീസൗഹൃദ വാട്സാപ്പ് എന്ന പേരിൽ വരുന്ന വാട്സാപ്പ് പിങ്ക്, ഒറിജിനൽ വാട്സാപ്പിന്റെ നല്ല പത്തരമാറ്റ് വ്യാജനാണ്. ഇത് ഡൗൺലോഡ് ചെയ്യാൻ ആവശ്യപ്പെട്ട് വരുന്ന ലിങ്കിൽ ക്ലിക്ക് ചെയ്താൽ അതോടെ ഇവൻ നിങ്ങളുടെ ഫോണിനെ അപകടത്തിലാക്കും. ഡൗൺലോഡ് ചെയ്ത് ഇൻസ്റ്റാൾ ചെയ്താൽ ഇവൻ നിങ്ങളുടെ ഫോണിലെ മുഴുവൻ വിവരങ്ങളും നല്ല അന്തസായി ചോർത്തും. നിങ്ങളുടെ ബാങ്ക് വിവരങ്ങൾ, കോണ്ടാക്ട് വിവരങ്ങൾ, ഫോട്ടോകൾ, വീഡിയോകൾ തുടങ്ങി ഫോണിലുള്ള എല്ലാം നിമിഷങ്ങൾക്കുള്ളിൽ ഹാക്കർമാരുടെ കൈകളിൽ എത്തും.
ഇങ്ങനെ ഹാക്ക് ചെയ്യപ്പെട്ട ഫോൺ നമ്പരുകളിൽ നിന്ന് നിങ്ങളുടെ കോണ്ടാക്ടിൽ ഉള്ള എല്ലാവരിലേക്കും പുതിയ പിങ്ക് വാട്സാപ്പ് ഡൗൺലോഡ് ചെയ്യാനുള്ള സന്ദേശം നിങ്ങളുടെ പേരിൽ എത്തും. ഇതോടെ എന്ത് സംഭവിക്കും എന്ന് പറയേണ്ടതില്ലല്ലോ..? വൈറസ് പോലെ ഇവൻ പടരും.
മാൽവെയറുകളുടെ കൂട്ടത്തിലാണ് ഐടി വിദഗ്ധർ വാട്സാപ്പ് പിങ്കിനെ ഉൾപ്പെടുത്തിയിരിക്കുന്നത്. ആൻഡ്രോയ്ഡ് ഫോണുകളിൽ കടന്നു കൂടുന്ന വാട്സാപ്പ് പിങ്ക് പ്രധാനമായും ലക്ഷ്യം വെക്കുന്നത് ഉപയോക്താക്കളുടെ ഒടിപികൾ അടക്കമുള്ള സാമ്പത്തിക വിവരങ്ങളാണ്. പ്ലേ സ്റ്റോറിൽ ഇല്ലാത്ത തേർഡ് പാർട്ടി ആപ്പാണ് ഇത്. അതിനാൽ തന്നെ, ഐഫോണുകൾക്ക് ഇത് ഭീഷണിയല്ല. കാരണം ആപ്പിൾ സ്റ്റോറിന് പുറത്തുള്ള ഒരു ആപ്പുകളും ഐഫോണുകളിൽ ഇൻസ്റ്റാൾ ചെയ്യാൻ സാധിക്കില്ല.
വാട്സാപ്പ് പിങ്ക് നിങ്ങളുടെ ഫോണിൽ പ്രവർത്തിച്ച് തുടങ്ങിയാൽ പിന്നെ നിങ്ങൾക്ക് നിങ്ങളുടെ ഫോണിന്റെ നിയന്ത്രണം നഷ്ടമാകും. ഇതോടൊപ്പം ഹാക്കർമാർ സ്പൈവെയറുകൾ കൂടി നിങ്ങളുടെ ഫോണുകളിലേക്ക് അനായാസം കടത്തി വിടും. ഇതോടെ നിങ്ങളുടെ ഫോൺ സംഭാഷണങ്ങളും സന്ദേശങ്ങളും വീഡിയോ കോളുകളും എല്ലാം ഹാക്കർമാരുടെ കൈകളിൽ എത്തും.
നിങ്ങളുടെ രഹസ്യ വിവരങ്ങൾ ദുരുപയോഗം ചെയ്ത് ഹാക്കർമാർ ബ്ലാക്ക്മെയിൽ ചെയ്യാൻ സാദ്ധ്യതയുണ്ടെന്ന് സൈബർ സുരക്ഷാ വിഭാഗവും പോലീസും മുന്നറിയിപ്പ് നൽകുന്നു. അബദ്ധവശാൽ വാട്സപ്പ് പിങ്ക് ഇൻസ്റ്റാൾ ചെയ്ത് പോയവർ അതിവേഗം അത് അൺ ഇൻസ്റ്റാൾ ചെയ്ത് ഫോൺ ഫോർമാറ്റ് ചെയ്യണമെന്നും ഇവർ മുന്നറിയിപ്പ് നൽകുന്നു.
വാട്സാപ്പ് പിങ്ക് പോലെയുള്ള അബദ്ധങ്ങളിൽ ചെന്ന് ചാടാതിരിക്കാൻ, ഗുഗിൾ പ്ലേ സ്റ്റോറിൽ നിന്ന് അല്ലാതെയുള്ള ഒരു പ്ലാറ്റ്ഫോമുകളിൽ നിന്നും ആപ്പുകൾ ഡൗൺലോഡ് ചെയ്യരുത്. വാട്സാപ്പ് ബീറ്റ വേർഷൻ പോലും ഗൂഗിൾ പ്ലേ സ്റ്റോറിന് പുറത്ത് നിന്നും ഡൗൺലോഡ് ചെയ്ത് ഉപയോഗിക്കുന്നത് അപകടങ്ങൾ ക്ഷണിച്ച് വരുത്തും.
Discussion about this post