തിരുവനന്തപുരം: സംസ്ഥാനത്തെ സർക്കാർ ഓഫീസുകൾക്ക് പുറമേ ബാങ്കുകളിലും ഇത് ഓണാവധിക്കാലമാണ്. ഓണം പ്രമാണിച്ച് ബാങ്കുകൾക്ക് അവധി നൽകിയിരിക്കുന്ന ദിവസങ്ങൾ ഏതൊക്കെയെന്ന് കൃത്യമായി മനസിലാക്കിയാൽ വലിയ കുഴപ്പങ്ങളില്ലാതെ ഇടപാടുകാർക്ക് കാര്യങ്ങൾ സാദ്ധ്യമാകും. ഇല്ലെങ്കിൽ ഓണക്കാലത്ത് സാമ്പത്തിക ആവശ്യങ്ങൾക്ക് വട്ടം ചുറ്റും എന്നത് ഉറപ്പാണ്.
ഒന്നാം ഓണ ദിവസമായ ഓഗസ്റ്റ് 28 തിങ്കളാഴ്ച (ഇന്ന്) ബാങ്കുകൾക്ക് അവധിയാണ്. ഓഗസ്റ്റ് 29 ചൊവ്വാഴ്ച തിരുവോണ ദിനത്തിലും ബാങ്കുകൾ പ്രവർത്തിക്കില്ല. ഓഗസ്റ്റ് 30 ബുധനാഴ്ച രക്ഷാബന്ധൻ ദിനത്തിലും ബാങ്കുകൾക്ക് അവധിയാണ്. എന്നാൽ കേരളത്തിൽ ഈ ദിവസം ബാങ്ക് അവധി ഇല്ല എന്നത് ആശ്വാസകരമാണ്.
തൊട്ടടുത്ത ദിവസം ഓഗസ്റ്റ് 31 വ്യാഴാഴ്ച ശ്രീനാരായണ ഗുരു ജയന്തി ദിനത്തിലും കേരളത്തിലെ ബാങ്കുകൾക്ക് അവധിയാണ്. അതിനാൽ മാസാവസാന ഇടപാടുകൾ നടത്താൻ കേരളത്തിലെ ഇടപാടുകാർക്ക് ഇനി ആകെ അവശേഷിക്കുന്നത് ഓഗസ്റ്റ് 30 ബുധനാഴ്ച ദിവസം മാത്രമാണ്.
അതേസമയം, ബാങ്ക് അവധി ദിനങ്ങളിലും എടിഎം സേവനങ്ങൾ തടസപ്പെടില്ലെന്ന് വിവിധ ബാങ്കുകൾ അറിയിച്ചിട്ടുണ്ട്. ഓണക്കാലം പ്രമാണിച്ച് എല്ലാ എടിഎമ്മുകളിലും പണലഭ്യത ഉറപ്പ് വരുത്തണമെന്ന് ബാങ്കുകൾക്ക് റിസർവ് ബാങ്ക് നിർദേശം നൽകിയിരുന്നു. ഓൺലൈൻ സേവനങ്ങൾക്കും യുപിഐ ഇടപാടുകൾക്കും തടസമുണ്ടാകില്ല.
Discussion about this post