രജനികാന്ത് നായകനായ ജയിലർ ഇപ്പോഴും വിജയകരമായി പ്രദർശനം തുടരുകയാണ്. ഇപ്പോഴിതാ തന്റെ അടുത്ത ചിത്രവും രജനി പ്രഖ്യാപിച്ചിരിക്കുകയാണ്. തലൈവരുടെ 170-ാമത് ചിത്രമാണ് പുറത്തിറങ്ങാനിരിക്കുന്നത്. ജയ് ഭീം എന്ന ഏറെ പ്രേക്ഷക ശ്രദ്ധ പിടിച്ചുപറ്റിയ ചിത്രത്തിന്റെ സംവിധായകനായ ടി ജെ ജ്ഞാനവേൽ ആണ് രജനികാന്തിന്റെ അടുത്ത ചിത്രം ഒരുക്കുന്നത്.
തലൈവർ 170 എന്ന് വിളിക്കുന്ന ഈ ചിത്രത്തിന്റെ പ്രീ പ്രൊഡക്ഷൻ ജോലികൾ ആരംഭിച്ചതായാണ് അറിയുന്നത്.സിനിമയുടെ ചിത്രീകരണം സെപ്റ്റംബർ 19ന് ആരംഭിക്കുമെന്ന് പറയുന്നു. അമിതാഭ് ബച്ചനും ഫഹദ് ഫാസിലും തലൈവരുടെ ഈ പുതിയ ചിത്രത്തിൽ അതിഥി വേഷത്തിൽ എത്തുമെന്ന് സൂചനയുണ്ട്. ലൈക പ്രൊഡക്ഷൻസ് ആണ് ചിത്രം ഒരുക്കുന്നത്. അനിരുദ്ധ് രവിചന്ദർ സംഗീതസംവിധാനം നിർവഹിക്കും.
രജനികാന്തിനോടൊപ്പം തെലുങ്ക് നടൻ നാനി ഈ ചിത്രത്തിൽ ഒരു പ്രധാന വേഷം അവതരിപ്പിക്കും എന്നാണ് പറയപ്പെടുന്നത്. റാണ ദഗ്ഗുബതി, ശർവാനന്ദ്, നടി ദുഷാര വിജയൻ എന്നിവരായിരിക്കും ചിത്രത്തിലെ മറ്റു താരങ്ങൾ എന്നും സൂചനയുണ്ട്. മലയാളികളുടെ പ്രിയതാരം മഞ്ജു വാര്യരും ചിത്രത്തിൽ ഉണ്ടാകുമെന്ന് പറയപ്പെടുന്നുണ്ട്.
