എറണാകുളം : മന്ത്രിമാരോടൊപ്പം വേദി പങ്കിടുന്നതിനിടെ സര്ക്കാരിന്റെ നെല് കര്ഷകര്ക്കെതിരെയുള്ള നിലപാടുകളെ വിമര്ശിച്ച നടന് ജയസൂര്യയ്ക്ക് പിന്തുണയുമായി ജോയ് മാത്യു. ജയസൂര്യയാണ് ഇക്കോല്ലത്തെ തിരുവോണസൂര്യനെന്ന് ഫേസ്ബുക്കില് ജോയ് മാത്യു കുറിച്ചു. ‘തമ്പ്രാനെ മുതുക് കുനിച്ചു വണങ്ങിയാലേ എന്തെങ്കിലും നക്കാപ്പിച്ച കിട്ടൂവെന്ന് കരുതുന്നവര്ക്കിടയില് നടത്തിയ ജനകീയ വിചാരണയോടെ ജയസൂര്യ ആ പേരുപോലെ ജയിച്ച സൂര്യനായി’, അദ്ദേഹം പറഞ്ഞു.
ഫേസ്ബുക്ക് പോസ്റ്റിന്റെ പൂര്ണ രൂപം :
തിരുവോണസൂര്യന്
——————-
മന്ത്രിമാരുള്ള വേദിയില് പഞ്ചപുച്ഛമടക്കിതൊഴുതു താണുവണങ്ങി നില്ക്കുന്ന കലാ-സാഹിത്യകാരാണെങ്ങും.
ഇപ്പോഴും രാജവാഴ്ചയാണെന്നും തമ്പ്രാനെ മുതുക് കുനിച്ചു വണങ്ങിയാലേ എന്തെങ്കിലും നക്കാപ്പിച്ച കിട്ടൂവെന്ന് കരുതുന്നവര്ക്കിടയില് നടത്തിയ ജനകീയ വിചാരണയോടെ ജയസൂര്യ ആ പേരുപോലെ ജയിച്ച സൂര്യനായി.
അധികാരികളുടെ പുറം ചൊറിയലല്ല, ദുരിതമനുഭവിക്കുന്നവരുടെ നിസ്സഹായാവസ്ഥ അവരെ ബോധിപ്പിക്കുകയാണ് വേണ്ടത് എന്ന ശരിയായ തീരുമാനം പ്രവൃത്തിപഥത്തില് കൊണ്ടുവന്ന ജയ സൂര്യയാണ് ഇക്കൊല്ലത്തെ തിരുവോണസൂര്യന്!
Discussion about this post