ന്യൂഡൽഹി : ‘റോക്കട്രി’ എന്ന ചിത്രത്തിന് ദേശീയ അവാർഡ് ലഭിച്ചതിന്റെ പുറകേ നടൻ ആർ മാധവന് പുതിയ സന്തോഷം. ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയുടെ (FTII) പ്രസിഡന്റായും ഗവേണിംഗ് കൗൺസിൽ ചെയർമാനായും മാധവനെ നിയമിച്ചു. കേന്ദ്ര ഇൻഫർമേഷൻ & ബ്രോഡ്കാസ്റ്റിംഗ് മന്ത്രി അനുരാഗ് താക്കൂർ ആണ് എഫ്ടിഐഐ പ്രസിഡന്റ് ആയി മാധവനെ പ്രഖ്യാപിച്ച വിവരം വെളിപ്പെടുത്തിയത്.
ചലച്ചിത്ര നിർമ്മാതാവ് ശേഖർ കപൂർ ആയിരുന്നു നേരത്തെ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യയുടെ പ്രസിഡന്റ് സ്ഥാനം വഹിച്ചിരുന്നത്. മഹാരാഷ്ട്രയിലെ പൂനെയിൽ സ്ഥിതി ചെയ്യുന്ന FTII കേന്ദ്ര ഗവൺമെന്റിന്റെ ഇൻഫർമേഷൻ & ബ്രോഡ്കാസ്റ്റിംഗ് മന്ത്രാലയത്തിന്റെ പരിധിയിൽ വരുന്ന സ്ഥാപനമാണ്. ഫിലിം എഡിറ്റിംഗ്, ഡയറക്ഷൻ ഛായാഗ്രഹണം, ഓഡിയോഗ്രഫി, അഭിനയം, കലാസംവിധാനം, കമ്പ്യൂട്ടർ ഗ്രാഫിക്സ്, ആനിമേഷൻ എന്നിങ്ങനെ ചലച്ചിത്ര മേഖലയുമായി ബന്ധപ്പെട്ട നിരവധി പരിശീലന കോഴ്സുകൾ ഈ ഇൻസ്റ്റിറ്റ്യൂട്ടിൽ നൽകപ്പെടുന്നുണ്ട്.
ആർ മാധവന്റെ ആദ്യ സംവിധാന സംരംഭമായ ‘റോക്കട്രി: ദി നമ്പി ഇഫക്റ്റ്’ ഇത്തവണ മികച്ച ഫീച്ചർ ഫിലിമിനുള്ള ദേശീയ അവാർഡ് കരസ്ഥമാക്കിയിരുന്നു. നിലവിൽ ശശികാന്ത് സംവിധാനം ചെയ്യുന്ന ‘ടെസ്റ്റ്’ എന്ന ചിത്രത്തിലാണ് മാധവൻ അഭിനയിക്കുന്നത്.
Discussion about this post