ബ്രിട്ടീഷ് കൊളമ്പിയ : തോക്കിന്റെയും കൃപാണ് കത്തിയുടേയും പടങ്ങള് പ്രചരണ പോസ്റ്ററുകള് ഉപയോഗിച്ചതിനെ തുടര്ന്ന് ഖാലിസ്ഥാന് അനുകൂലികള് നടത്താന് നിശ്ചയിച്ചിരുന്ന ഹിത പരിശോധന കനേഡിയന് സര്ക്കാര് റദ്ദാക്കി. സെപ്റ്റംബര് 10ന് ബ്രിട്ടീഷ് കൊളംബിയയിലെ സറേ പട്ടണത്തിലെ തമനവിസ് സെക്കന്ഡറി സ്കൂളിലാണ് ‘ഖാലിസ്ഥാന് റഫറണ്ടം’ എന്ന് വിളിക്കപ്പെടുന്ന ഹിതപരിശോധന നിശ്ചയിച്ചിരുന്നത്. എന്നാല് പോസ്റ്ററുകളില് എകെ 47 ന്റെയും കൃപാണ് കത്തിയുടേയും മെഷീന് ഗണ്ണിന്റെയുമൊക്കെ പടങ്ങളാണ് സംഘാടകര് തിരഞ്ഞെടുപ്പ് പ്രചരണാര്ഥം ഉപയോഗിച്ചത്. സര്ക്കാര് സ്കൂള് വാടകയ്ക്ക് നല്കിയപ്പോള് കരാറില് പറഞ്ഞിരുന്ന നിര്ദ്ദേശങ്ങള് ലംഘിച്ചതിനാലാണ് ഹിത പരിശോധനയ്ക്ക് അനുമതി നിഷേധിച്ചതെന്ന് സറേ ഡിസ്ട്രിക്റ്റ് സ്കൂള് ബോര്ഡിന്റെ വക്താവ് പുറത്തിറക്കിയ പ്രസ്താവനയില് വ്യക്തമാക്കി.
‘ആയുധങ്ങള് ഉള്പ്പെടുത്തിയ പോസ്റ്റര് ഭീകരാക്രമണങ്ങളെ പ്രോല്സാഹിപ്പിക്കുന്നതാണെന്നും രാജ്യത്തിന്റെ സമാധാനാന്തരീക്ഷത്തിന് ഭീഷണിയാണെന്നും കാട്ടി പരാതികള് ഉയര്ന്നിരുന്നു. ഈ സാഹചര്യത്തില് പോസ്റ്ററുകള് നീക്കം ചെയ്യാനും പ്രശ്നം പരിഹരിക്കാനും പല തവണ ആവര്ത്തിച്ചിട്ടും സംഘാടകര് കേട്ടില്ല. കൂടാതെ സറേയിലും സോഷ്യല് മീഡിയയിലും ഇത്തരം പോസ്റ്ററുകള് പങ്ക് വയ്ക്കുന്നത് സംഘാടകര് തുടരുകയും ചെയ്തു. ഇതിന്റെ അടിസ്ഥാനത്തിലാണ് അനുമതി നിഷേധിച്ചത്’, പ്രസ്താവനയില് പറഞ്ഞു. സ്കൂളിന്റെ ചിത്രത്തിനോടൊപ്പം ആയുധങ്ങളുടേയും ചിത്രങ്ങള് ചേര്ത്താണ് ‘ഖാലിസ്ഥാന് റെഫറണ്ടം’ സംഘാടകര് പോസ്റ്ററുകള് ഇറക്കിയത്.
ഒരു സ്കൂള് ജില്ല എന്ന നിലയില്, വിദ്യാര്ത്ഥികള്ക്ക് ഗുണനിലവാരമുള്ള വിദ്യാഭ്യാസവും പിന്തുണയും നല്കുകയും വിദ്യാഭ്യാസ സമൂഹത്തിന് സുരക്ഷിതമായ അന്തരീക്ഷം ഉറപ്പാക്കുകയും ചെയ്യുക എന്നതാണ് ഞങ്ങളുടെ പ്രാഥമിക ദൗത്യം. കരാറില് നല്കിയിരിക്കുന്ന നയങ്ങളും മാര്ഗ്ഗനിര്ദ്ദേശങ്ങളും സ്കൂള് വാടകയ്ക്കെടുക്കുന്നവര് പാലിച്ചിരിക്കണം എന്ന് നിബന്ധനയുണ്ടെന്നും ഖലിസ്ഥാന് അനുകൂലികള് അവ അനുസരിച്ചില്ലെന്നും സ്കൂള് വക്താവ് പ്രസ്താവനയില് കൂട്ടിച്ചേര്ത്തു.
അതേ സമയം, സറേ ആസ്ഥാനമായുള്ള ഫ്രണ്ട്സ് ഓഫ് കാനഡയുടെയും ഇന്ത്യ ഫൗണ്ടേഷന്റെയും അദ്ധ്യക്ഷന് മനീന്ദര് ഗില് സ്കൂളിന്റെ നിലപാട് സ്വാഗതം ചെയ്യുന്നതായി അറിയിച്ചു. ഒരു സര്ക്കാര് സ്കൂള്, ഖാലിസ്ഥാന് പോലുള്ള ഭീകര സംഘടനയുടെ പരിപാടിക്കായി നല്കിയതിനും സ്കൂള് പരിസരത്ത് ഖലിസ്ഥാന് ഭീകരനായ തല്വീന്ദര് സിംഗ് പര്മറിന്റെ ചിത്രങ്ങള് പതിച്ചതിനുമെതിരെ ഇന്തോ-കനേഡിയന് വിഭാഗം സ്കൂള് ബോര്ഡിന് പരാതി നല്കിയിരുന്നു. 1985 ജൂണ് 23ന് 329 പേരുടെ മരണത്തിനിടയാക്കിയ എയര് ഇന്ത്യ ഫ്ളൈറ്റ് 182, കനിഷ്ക ബോംബ് സ്ഫോടനത്തിന്റെ മുഖ്യ സൂത്രധാരനാണ് തല്വീന്ദര് സിംഗ പര്മര്.
അതേസമയം, ഖലിസ്ഥാന് ഭീകരാനുകൂലികളുടെ പ്രവര്ത്തനങ്ങള്ക്ക് ക്യാനഡ അനുകൂല നിലപാട് എടുക്കുന്നതിനെ ഇന്ത്യ ശക്തമായി അപലപിച്ചു.
Discussion about this post