ഹൈദരാബാദ് : കുഷി സിനിമയുടെ വിജയത്തിന് പുറകെ തന്റെ പ്രതിഫലത്തിൽ നിന്നും ഒരു കോടി രൂപ പാവപ്പെട്ട കുടുംബങ്ങൾക്കായി ചെലവഴിക്കുകയാണ് നടൻ വിജയ് ദേവരകൊണ്ട. 100 നിർധന കുടുംബങ്ങൾക്ക് ഒരു ലക്ഷം രൂപ വീതമാണ് സഹായമായി നൽകുന്നത്. സിനിമയുടെ വിജയാഘോഷത്തിന്റെ ഭാഗമായി വിശാഖപട്ടണത്ത് നടന്ന ഒരു പരിപാടിയിലാണ് നടൻ ഈ തീരുമാനം പ്രഖ്യാപിച്ചത്.
സാമന്ത റൂത്ത് പ്രഭുവും വിജയ് ദേവരകൊണ്ടയും ഒന്നിക്കുന്ന റൊമാന്റിക് മൂവിയാണ് കുഷി. ആക്ഷൻ മൂവി ലൈഗറിന്റെ പരാജയത്തിനുശേഷം വീണ്ടും തന്റെ സ്വതസിദ്ധമായ റൊമാന്റിക് മൂവികളിലേക്ക് ചുവടുപിടിച്ചിരിക്കുകയാണ് വിജയ് ദേവരകൊണ്ട. ഹിന്ദിയിൽ അടക്കം നിരവധി ഭാഷകളിൽ റിലീസ് ചെയ്തിട്ടുള്ള കുഷിക്ക് ഇപ്പോൾ മികച്ച പ്രതികരണമാണ് ലഭിക്കുന്നത്.
ഹൈദരാബാദിൽ കുഷി പ്രദർശിപ്പിക്കുന്ന തിയേറ്ററുകൾ സന്ദർശിച്ച ശേഷമാണ് വിജയ് ദേവരകൊണ്ട വിശാഖപട്ടണത്തെ പരിപാടിയിൽ വച്ച് ഈ തീരുമാനം അറിയിച്ചത്. 10 ദിവസത്തിനുള്ളിൽ 100 നിർധന കുടുംബങ്ങൾക്ക് ധനസഹായം നൽകാനാണ് തീരുമാനം. താൻ നൽകുന്ന പണം തന്റെ ദരിദ്രരായ ആരാധകരെ അവരുടെ വാടകയോ ബില്ലുകളോ മറ്റെന്തെങ്കിലുമോ അടയ്ക്കാൻ സഹായിക്കുകയാണെങ്കിൽ അത് തനിക്ക് വളരെയധികം സന്തോഷം നൽകുമെന്നും അദ്ദേഹം കൂട്ടിച്ചേർത്തു. 10 ദിവസത്തിന് ശേഷം ഹൈദരാബാദിൽ വച്ച് നടക്കുന്ന മറ്റൊരു വിജയാഘോഷ പരിപാടിക്ക് മുൻപായി ധനസഹായം അർഹിക്കുന്നവരിലേക്ക് എത്തിക്കാനാണ് തീരുമാനം.
Discussion about this post