ഇസ്ലാമാബാദ്: പാകിസ്താനിൽ വീണ്ടും സൈനികർക്ക് നേരെ ഭീകരാക്രമണം. പാക് സൈനികൻ കൊല്ലപ്പെട്ടു. ഖൈബർ പക്തുൻഖ്വയിൽ രാവിലെയോടെയായിരുന്നു ആക്രമണം ഉണ്ടായത്.
മിർ അലി പ്രദേശത്തെ സൈനിക കേന്ദ്രത്തിന് നേരെയായിരുന്നു ആക്രമണം. വാഹനങ്ങളിൽ കേന്ദ്രത്തിലേക്ക് എത്തിയ ഭീകരർ ഇവിടെയുണ്ടായിരുന്ന സൈനികർക്ക് നേരെ വെടിയുതിർക്കുകയായിരുന്നു. അപ്രതീക്ഷിതമായുണ്ടായ ആക്രമണം ഫലപ്രദമായി ചെറുക്കാൻ പാക് സൈന്യത്തിന് കഴിഞ്ഞില്ല. ആക്രമണത്തിൽ നിരവധി പേർക്കാണ് പരിക്കേറ്റത്. ആക്രമണത്തിന് പിന്നാലെ ഭീകരർ അതിവേഗം സ്ഥലത്ത് നിന്നും രക്ഷപ്പെടുകയായിരുന്നു.
ലാൻസ് നായിക് ജംഷെദ് ഖാൻ ആണ് ഭീകരാക്രമണത്തിൽ കൊല്ലപ്പെട്ടത്. ഇയാളുടെ മൃതദേഹം ആശുപത്രിയിലേക്ക് മാറ്റി. തെഹരീക് ഇ താലിബാൻ ഭീകരരാണ് ആക്രമണത്തിന് പിന്നിൽ എന്നാണ് നിഗമനം. എന്നാൽ ഇവർ ഉത്തരവാദിത്വം ഏറ്റെടുത്തിട്ടില്ല.
അടുത്തിടെയായി ശക്തമായ ഭീകരാക്രമണങ്ങളാണ് തെഹരീക് ഇ താലിബാൻ നടത്തുന്നത്. കഴിഞ്ഞ ആഴ്ച അഫ്ഗാൻ അതിർത്തിയ്ക്ക് സമീപമുള്ള സൈനിക കേന്ദ്രങ്ങൾക്ക് നേരെ താലിബാൻ ഭീകരാക്രമണം നടത്തിയിരുന്നു. നിരവധി സൈനികർ ആയിരുന്നു ഈ ആക്രമണത്തിൽ കൊല്ലപ്പെട്ടത്.
