ന്യൂഡൽഹി : വിവിധ സഹകരണ മേഖലകളിൽ ഇന്ത്യയുമായുള്ള ബന്ധം ശക്തമാക്കാനുള്ള ശ്രമത്തിലാണ് സിംഗപ്പൂർ. ഇരു രാജ്യങ്ങളും തമ്മിലുള്ള പരസ്പര സഹകരണം മെച്ചപ്പെടുത്തുന്നതിനുള്ള ശ്രമത്തിന്റെ ഭാഗമായി സിംഗപ്പൂർ വിദേശകാര്യ മന്ത്രാലയ സെക്രട്ടറി ന്യൂഡൽഹിയിൽ എത്തി ഇന്ത്യൻ വിദേശകാര്യമന്ത്രാലയ സെക്രട്ടറിയുമായി കൂടിക്കാഴ്ച നടത്തി. വ്യാപാരം, നിക്ഷേപം, പ്രതിരോധം, സുരക്ഷ, ഫിൻടെക്, ഡിജിറ്റലൈസേഷൻ എന്നീ മേഖലകളിലെ ഇരു രാജ്യങ്ങളും തമ്മിലുള്ള സഹകരണം വർദ്ധിപ്പിക്കുന്നതിനുള്ള കൂടിയോലോചനകൾ നടന്നു.
വിദേശകാര്യ മന്ത്രാലയത്തിലെ കിഴക്കൻ മേഖലയുടെ ചുമതലയുള്ള സെക്രട്ടറി സൗരഭ് കുമാറും സിംഗപ്പൂർ വിദേശകാര്യ മന്ത്രാലയത്തിലെ രണ്ടാമത്തെ സ്ഥിരം സെക്രട്ടറിയായ ലൂക്ക് ഗോയും ചേർന്നാണ് വിദേശകാര്യ ഓഫീസ് കൺസൾട്ടേഷനുകൾക്ക് നേതൃത്വം നൽകിയത്. അന്താരാഷ്ട്ര സൗരോർജ്ജ സഖ്യത്തിൽ ചേരാനുള്ള സിംഗപ്പൂരിന്റെ തീരുമാനത്തെ ഇന്ത്യ അഭിനന്ദിച്ചു. ജി 20 ഉച്ചകോടിയിൽ ആരംഭിച്ച ആഗോള ജൈവ ഇന്ധന സഖ്യത്തിൽ ചേർന്നതിന് സിംഗപ്പൂരിന് നന്ദി അറിയിക്കുകയും ചെയ്തു.
2022 സെപ്റ്റംബറിൽ നടന്ന ഇന്ത്യ-സിംഗപ്പൂർ മിനിസ്റ്റീരിയൽ റൗണ്ട് ടേബിളിന് ശേഷം രാജ്യങ്ങൾ തമ്മിൽ ധാരണയായ സഹകരണ മേഖലകളുടെ വളർച്ചയിലും പുരോഗതിയിലും ഇരു രാജ്യങ്ങളും തൃപ്തി രേഖപ്പെടുത്തി. ജി 20 ഉച്ചകോടിക്കായി സിംഗപ്പൂർ പ്രധാനമന്ത്രി ലീ സിയാൻ ലൂംഗ് ഇന്ത്യ സന്ദർശിച്ചതിന് തൊട്ടുപിന്നാലെയാണ് ഇപ്പോൾ വിദേശകാര്യമന്ത്രാലയ തലത്തിലുള്ള സഹകരണ ചർച്ചകൾ നടക്കുന്നത്.
