തൃശൂർ : ബാങ്ക് ലോക്കറിൽ സൂക്ഷിച്ചിരുന്ന സ്വർണം കാണാതായെന്ന് പരാതി. കൊടുങ്ങല്ലൂർ ടൗൺ സഹകരണ ബാങ്കിലെ ലോക്കറിൽ സൂക്ഷിച്ചിരുന്ന സ്വർണമാണ് കാണാതായത്. 60 പവനോളം സ്വർണം നഷ്ടപ്പെട്ടിട്ടുണ്ട്. ബംഗളൂരുവിൽ കഴിയുന്ന യുവതിയാണ് നാട്ടിലെ ബാങ്ക് ലോക്കറിൽ സൂക്ഷിച്ചിരുന്ന സ്വർണ്ണം കാണാതായതായി പരാതി നൽകിയിട്ടുള്ളത്.
ബംഗളൂരുവിൽ താമസിക്കുന്ന സുനിത എന്ന യുവതിയുടെ സ്വർണാഭരണങ്ങളാണ് നഷ്ടപ്പെട്ടിട്ടുള്ളത്. 2022 ഒക്ടോബറിൽ ആണ് സുനിത സ്വർണാഭരണങ്ങൾ കൊടുങ്ങല്ലൂർ ടൗൺ സഹകരണ ബാങ്കിലെ ലോക്കറിൽ സൂക്ഷിക്കുന്നത്. നാലു ബോക്സുകളിൽ ആയാണ് സ്വർണ്ണം സൂക്ഷിച്ചിരുന്നത്. ഇതിൽ രണ്ട് ബോക്സുകൾ കാണാനില്ലെന്നാണ് സുനിതയുടെ പരാതി.
ബാങ്കിലെ സേഫ് ലോക്കറുകൾ രണ്ട് താക്കോലുകൾ ഉപയോഗിച്ച് മാത്രം തുറക്കാൻ കഴിയുന്നവയാണ്. സേഫ് കീ ഉപഭോക്താവിന്റെ കയ്യിലും മാസ്റ്റർ കീ ബാങ്കിലും ആയിരിക്കും സൂക്ഷിക്കുക. ഈ രണ്ടു താക്കോലുകളും ഒന്നിച്ചിട്ടാൽ മാത്രമേ ലോക്കർ തുറക്കാൻ കഴിയുകയുള്ളൂ. ഇങ്ങനെയിരിക്കെ ലോക്കറിൽ നിന്നും എങ്ങനെയാണ് ആഭരണങ്ങൾ കാണാതായത് എന്ന സംശയം ഉയരുന്നുണ്ട്. സംഭവത്തെ തുടർന്ന് സുനിത കൊടുങ്ങല്ലൂർ പോലീസിൽ പരാതി നൽകിയിട്ടുണ്ട്. ബാങ്കിലെ സ്വർണ്ണം കാണാതായെന്ന പരാതിയെക്കുറിച്ച് അന്വേഷിക്കണമെന്ന് ആവശ്യപ്പെട്ട് കൊടുങ്ങല്ലൂർ ടൗൺ സഹകരണ ബാങ്കും കൊടുങ്ങല്ലൂർ പോലീസിൽ പരാതി നൽകിയിട്ടുണ്ട്.
Discussion about this post