ആലപ്പുഴ : അമ്പലപ്പുഴയിൽ സാമൂഹ്യവിരുദ്ധർ പുതുതായി നിർമ്മാണം നടന്നുകൊണ്ടിരിക്കുന്ന സ്കൂളിന്റെ ജനൽ ചില്ല് അടിച്ചുതകർത്തു. കാക്കാഴം എസ്.എന്‍.വി.ടി.ടി.ഐ സ്കൂളിലായിരുന്നു സാമൂഹ്യവിരുദ്ധർ ആക്രമണം നടത്തിയത്. മുൻപും ഈ സ്കൂളിൽ സ്കൂളിന്റെ ജനൽച്ചില്ലുകൾ തകർക്കപ്പെട്ടിരുന്നു. പുതിയ കെട്ടിടത്തിലെ ടോയ്ലറ്റ് ഫിറ്റിംഗ്സും മോഷണം പോയിട്ടുണ്ട്. നേരം ഇരുട്ടിയാൽ ഈ പ്രദേശത്തെ സാമൂഹ്യവിരുദ്ധർ താവളമാക്കുകയാണെന്ന് നിരവധി പരാതികൾ ഉയർന്നിട്ടും അധികൃതരുടെ ഭാഗത്തുനിന്നും യാതൊരു നടപടിയും ഉണ്ടായിട്ടില്ല.
എസ്.എന്‍.വി.ടി.ടി.ഐ സ്കൂളിൽ പുതുതായി നിർമാണം നടന്നുകൊണ്ടിരിക്കുന്ന കെട്ടിടത്തിന്‍റെ നിരവധി ജനൽച്ചില്ലുകളാണ് തകർക്കപ്പെട്ടിട്ടുള്ളത്. ഇത് രണ്ടാം തവണയാണ് ഇത്തരത്തിൽ ജനൽ ചില്ലകൾ അടിച്ചു തകർക്കുന്നത്. ഏതാനും മാസം മുൻപ് നിർമാണം പൂർത്തിയാക്കിയ ടോയ്‌ലെറ്റിന്റെ ഫിറ്റിംഗ്സ് മോഷണം പോയപ്പോൾ പരാതി നൽകിയിരുന്നെങ്കിലും ഇതുവരെയും പ്രതികളെ പിടികൂടിയില്ലെന്ന് സ്കൂൾ പ്രധാനാധ്യാപിക ചാന്ദ്നി അറിയിച്ചു.
സ്കൂളിന് നേരെയുള്ള ആക്രമണങ്ങൾ തുടർക്കഥ ആവുകയാണെന്നും പോലീസ് പ്രതികളെ പിടികൂടാൻ തയ്യാറാകണമെന്നും പി ടി എ പ്രസിഡന്റ് സുബൈർ ആവശ്യപ്പെട്ടു. പ്രതികളെ ഇനിയും പിടികൂടാതെ ഇരിക്കുന്നത് ഇത്തരം സംഭവങ്ങൾ വീണ്ടും ഉണ്ടാകാൻ ഇടയാകും എന്നാണ് പി ടി എ സൂചിപ്പിക്കുന്നത്. സ്കൂൾ അധികൃതരുടെ പരാതിയെ തുടർന്ന് പോലീസ് അന്വേഷണം ആരംഭിച്ചിട്ടുണ്ട്.
Discussion about this post