ന്യൂഡൽഹി: ഖാലിസ്ഥാൻ വിഷയത്തിൽ ഇന്ത്യയും കാനഡയും തമ്മിലുള്ള ബന്ധം വഷളായതിന് പിന്നാലെ കനേഡിയൻ സൈന്യത്തിന്റെ വെബ്സൈറ്റ് ഹാക്ക് ചെയ്ത് ഇന്ത്യൻ ഹാക്കർമാർ. കനേഡിയൻ സായുധ സേനയുടെ ഔദ്യോഗിക വെബ്സൈറ്റിൽ കഴിഞ്ഞ ദിവസം താത്കാലിക തടസ്സം നേരിട്ടിരുന്നു. പിന്നാലെ ‘ഇന്ത്യൻ സൈബർ ഫോഴ്സ്’ എന്ന ഹാക്കർമാരുടെ സംഘം ഇതിന്റെ ഉത്തരവാദിത്തം ഏറ്റെടുത്തതായി അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്തു.
കനേഡിയൻ സൈന്യത്തിന്റെ വെബ്സൈറ്റിൽ ഉച്ചയ്ക്ക് നേരിട്ട തടസ്സം പിന്നീട് പരിഹരിച്ചു. കാനഡയിലെ പ്രതിരോധ വകുപ്പ് മീഡിയ റിലേഷൻസ് മേധാവി ഡാനിയൽ ലെ ബൗത്തിലിയർ ഇക്കാര്യം സ്ഥിരീകരിച്ചിട്ടുണ്ട്. കനേഡിയൻ എയർഫോഴ്സിന്റെ വെബ്സൈറ്റാണ് ഹാക്ക് ചെയ്തത്. ഇന്ത്യൻ സൈബർ ഫോഴ്സ് സംഘം വെബ്സൈറ്റ് ഹാക്ക് ചെയ്തതിന്റെ സ്ക്രീൻ ഷോട്ടുകൾ അടക്കം പങ്കുവച്ചിട്ടുണ്ട്.
ഡെസ്ക്ടോപ്പ് ഉപയോഗിക്കുന്നവർക്ക് വെബ്സൈറ്റിലേക്ക് പ്രവേശിക്കാൻ സാധിച്ചിരുന്നുവെങ്കിലും, മൊബൈൽ ഫോണുകളിൽ നിന്ന് ഈ വെബ്സൈറ്റിലേക്ക് ആക്സസ് ഉണ്ടായിരുന്നില്ല. സേനയുടെ മറ്റ് സൈറ്റുകളുമായി ഹാക്ക് ചെയ്യപ്പെട്ട വെബ്സൈറ്റിന് ബന്ധമില്ലെന്നും ബൗത്തിലിയർ പറഞ്ഞു. വിഷയത്തിൽ കനേഡിയൻ സൈന്യം അന്വേഷണം പ്രഖ്യാപിച്ചിട്ടുണ്ട്.
ഏതാനും ദിവസങ്ങൾക്ക് മുൻപ് ഇന്ത്യൻ സൈബർ ഫോഴ്സ് സംഘം വെബ്സൈറ്റ് ഹാക്ക് ചെയ്യുമെന്ന് കനേഡിയൻ സൈന്യത്തിന് മുന്നറിയിപ്പ് നൽകിയിരുന്നു. ഖാലിസ്ഥാൻ വിഷയത്തിൽ കാനഡ ഉന്നയിച്ച ആരോപണങ്ങളിന്മേൽ കടുത്ത അതൃപ്തിയും ഇന്ത്യൻ സൈബർ ഫോഴ്സ് സംഘം രേഖപ്പെടുത്തിയിരുന്നു.
Discussion about this post