5 വർഷത്തിലേറെ നീണ്ടുനിന്ന വിലക്കിനൊടുവിൽ സിനിമയിലേക്കു തിരിച്ചെത്തി ഗായികയും ഡബ്ബിങ് ആര്ട്ടിസ്റ്റുമായ ചിന്മയി ശ്രീപദ. ലോകേഷ് കനകരാജിന്റെ സംവിധാനത്തിൽ വിജയ് നായകനാകുന്ന ‘ലിയോ’ എന്ന ചിത്രത്തിനു വേണ്ടി ഡബ്ബ് ചെയ്തുകൊണ്ടാണ് ചിന്മയി വീണ്ടും സിനിമയിലേക്കെത്തുന്നത്.
ലിയോയിലെ നായിക തൃഷയ്ക്കു വേണ്ടിയാണ് ചിന്മയി ശബ്ദം പകരുന്നത്. സിനിമയുടെ തെലുങ്ക്, കന്നഡ എന്നീ പതിപ്പുകളിലും ചിന്മയി തന്നെയാണ് വേണ്ടി ഡബ്ബ് ചെയ്യുക. തിരിച്ചുവരവിന്റെ ആഹ്ളാദം തന്റെ സമൂഹമാധ്യമങ്ങളിലൂടെ ചിന്മയി പ്രകടിപ്പിച്ചു. ഇത്തരമൊരു നിലപാടെടുത്തതിന് ലോകേഷ് കനകരാജിനോടും ചിത്രത്തിന്റെ നിർമാതാവ് ലളിതിനോടും നന്ദി പറയുകയാണെന്ന് ചിന്മയി കുറിച്ചു. തുടർന്ന്, തൃഷ, ഖുഷ്ബു തുടങ്ങി നിരവധി പേരാണ് പ്രതികരണങ്ങളുമായി എത്തിയത്.
തമിഴ് സിനിമാ ലോകത്ത് മീ ടൂ ആരോപണമുന്നയിച്ച് രംഗത്തുവന്ന ആളുകളിൽ പ്രധാനിയാണ് ചിന്മയി ശ്രീപദ. 2018ല് കവിയും ഗാനരചയിതാവുമായ വൈരമുത്തുവിനെതിരെ ഗായിക പരാതി നൽകുകയായിരുന്നു. സംഗീതപരിപാടിക്കായി സ്വിറ്റ്സർലൻഡിലെത്തിയപ്പോൾ വൈരമുത്തു അവിടെവച്ച് തന്നെ ലൈംഗികമായി ഉപദ്രവിച്ചെന്ന് ട്വിറ്ററിലൂടെ ഗായിക അന്ന് വെളിപ്പെടുത്തി. ഈ വെളിപ്പെടുത്തൽ തമിഴ് സിനിമാ–സംഗീതമേഖലയെ ഒന്നാകെ പിടിച്ചുലച്ചു. തുടർന്ന് സൗത്ത് ഇന്ത്യന് സിനി ടെലിവിഷന് ആര്ട്ടിസ്റ്റ്സ് ആന്ഡ് ഡബ്ബിങ് യൂണിയന് ചിന്മയിയെ സിനിമയില് നിന്ന് വിലക്കുകയായിരുന്നു.
Discussion about this post