ദുബായിലെ ആദ്യ ഡിജിറ്റല്‍ ഗോള്‍ഡന്‍ വിസക്ക് ഉടമയായി ചലച്ചിത്ര താരം ഹണി റോസ്. പത്ത് വര്‍ഷത്തെ കാലാവധിയാണ് ഡിജിറ്റല്‍ ബിസിനസ്സ് വാലെറ്റിലുള്ള യു.എസ്.ബി ചിപ്പ് അടങ്ങിയിട്ടുള്ള ഈ വിസക്കുള്ളത്. ദുബായിലെ മുന്‍നിര സര്‍ക്കാര്‍ സേവന ദാതാക്കളായ ഇ.സി.എച്ച് ഡിജിറ്റല്‍ ആസ്ഥാനത്തെത്തിയ താരം സി.ഇ ഓ ഇഖ്ബാല്‍ മാര്‍ക്കോണിയില്‍ നിന്നാണ് വിസ സ്വീകരിച്ചത്.
ഡിജിറ്റല്‍ ബിസിനസ് വാലെറ്റില്‍ ഗോള്‍ഡന്‍ വിസക്ക് പുറമെ എമിറേറ്റ്‌സ് ഐ.ഡി ,താമസ വിസ, പാസ്‌പോര്‍ട്ട് തുടങ്ങിയ ഡിജിറ്റല്‍ രേഖകള്‍ എല്ലാം ഒറ്റ ബിസിനെസ്സ് വാലെറ്റില്‍ ലഭ്യമാകും. നേരത്തെ പാസ്സ്‌പോര്‍ട്ടില്‍ പതിച്ചു നല്‍കിയിരുന്ന വിസ പതിപ്പ് പൂര്‍ണമായും നിർത്തലാക്കിയാണ് പുതിയ ഡിജിറ്റല്‍ ബിസിനെസ്സ് വാലെറ്റ് പുറത്തിറക്കിയത്. ഇതുവരെ ഒട്ടേറെ മലയാള സിനിമാ താരങ്ങള്‍ക്ക് ദുബായിലെ ഇ.സി.എച്ച് ഡിജിറ്റല്‍ മുഖേന യുഎഇ ഗോള്‍ഡന്‍ വിസ ലഭിച്ചിട്ടുണ്ട്.
വിനയൻ സംവിധാനം ചെയ്ത ‘ബോയ് ഫ്രണ്ട്’ എന്ന മലയാള സിനിമയില്‍ക്കൂടി വെള്ളിത്തിരയിൽ എത്തിയ ഹണിറോസ് തെലുങ്ക് ഉളപ്പടെ അന്യഭാഷാ ചിത്രങ്ങളിലും തന്റെ ശക്തമായ സാഹ്നിധ്യം ഇതിനോടകം അറിയിച്ചുകഴിഞ്ഞു. ഉദ്ഘാടന ചടങ്ങുകളിലും തിളങ്ങുന്ന താരം സോഷ്യല്‍ മീഡിയയിലും സജീവമാണ്.
നിലവില്‍ ആനന്ദിനി ബാല സംവിധാനം ചെയ്യുന്ന ‘റേച്ചല്‍’ എന്ന ചിത്രത്തില്‍ കേന്ദ്ര കഥാപാത്രത്തെ അവതരിപ്പിക്കുകയാണ് ഹണി. ചിത്രത്തിന്റെ ചിത്രീകരണം പാലക്കാട് ആരംഭിച്ചിട്ടുണ്ട്. ഹണി റോസിന്റെ വ്യത്യസ്തമായ ഗെറ്റപ്പ് മൂലം ആദ്യ പോസ്റ്ററിലൂടെതന്നെ ഏറെ ജനശ്രദ്ധ ‘റേച്ചല്‍’ പിടിച്ചുപറ്റിയിരുന്നു. ബാദുഷ പ്രൊഡക്ഷന്‍സ്, പെന്‍ ആന്റ് പേപ്പര്‍ ക്രിയേഷന്‍സ് എന്നീ ബാനറില്‍ ബാദുഷ എന്‍ എം, ഷിനോയ് മാത്യു, എബ്രിഡ് ഷൈന്‍ എന്നിവര്‍ ചേർന്നാണ് ഈ ചിത്രം നിർമിക്കുന്നത്.
ബാബുരാജ്, കലാഭവന്‍ ഷാജോണ്‍, റോഷന്‍, ചന്തു സലിംകുമാര്‍, രാധിക തുടങ്ങിയവരും ചിത്രത്തില്‍ അണിനിരക്കുന്നുണ്ട്. രാഹുല്‍ മണപ്പാട്ട്, എബ്രിഡ് ഷൈന്‍ എന്നിവര്‍ ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
Discussion about this post