ന്യൂഡല്‍ഹി : മഹുവ മൊയ്ത്രയ്‌ക്കെതിരെ കൂടുതല്‍ ഗുരുതര ആരോപണങ്ങളുമായി ബിജെപി എം പി നിഷികാന്ത് ദുബെ. തൃണമൂല്‍ കോണ്‍ഗ്രസ് എം പിയുടെ പാര്‍ലമെന്റ് ലോഗിന്‍ ഐഡി ദുബൈയില്‍ ഉപയോഗിച്ചിരുന്നതായി നിഷികാന്ത് ദുബെ ആരോപിക്കുന്നു. ഈ സമയം മഹുവ മൊയ്ത്ര ഇന്ത്യയില്‍ ആയിരുന്നു ഇത് കുറ്റകൃത്യം നടന്നതിന് തെളിവാണ്. ഇതുമായി ബന്ധപ്പെട്ട വിവരങ്ങള്‍ നാഷണല്‍ ഇന്‍ഫോര്‍മാറ്റിക്‌സ് സെന്റര്‍ (എന്‍ഐസി) അന്വേഷണ ഏജന്‍സികളോട് വെളിപ്പെടുത്തിയിട്ടുണ്ടെന്നും അദ്ദേഹം പറഞ്ഞു. തന്റെ ഒദ്യോഗിക എക്‌സ് അക്കൗണ്ടിലൂടെയാണ് നിഷികാന്ത് ദുബെയുടെ പ്രതികരണം.
“ഒരു എംപി കുറച്ച് പണത്തിന് വേണ്ടി രാജ്യത്തിന്റെ സുരക്ഷ പണയം വെച്ചു”, നിഷികാന്ത് ദുബെ കുറിച്ചു. ആ എംപി ഇന്ത്യയില്‍ ആയിരുന്നപ്പോഴാണ് അവരുടെ ഐഡി ദുബൈയില്‍ വച്ച് ഉപയോഗിച്ചതായി കണ്ടെത്തിയിരിക്കുന്നത്. പ്രധാനമന്ത്രിയും ധനവകുപ്പും കേന്ദ്ര ഏജന്‍സികളും ഉള്‍പ്പെടെ മുഴുവന്‍ ഇന്ത്യന്‍ സര്‍ക്കാരും ആശ്രയിക്കുന്നത് ഈ എന്‍ഐസി ആണെന്നും അദ്ദേഹം കൂട്ടിച്ചേര്‍ത്തു.
“തൃണമൂല്‍ കോണ്‍ഗ്രസും (ടിഎംസി) പ്രതിപക്ഷവും ഇനിയും രാഷ്ട്രീയം കളിക്കേണ്ടതുണ്ടോ? ഇനി ജനങ്ങളാണ് തീരുമാനമെടുക്കുക. എംപിയുടെ ലോഗിന്‍ ഐഡി അനധികൃതമായി ഉപയോഗിച്ചതിന്റെ വിവരങ്ങള്‍ എന്‍ഐസി അന്വേഷണ ഏജന്‍സിക്ക് നല്‍കിയിട്ടുണ്ട്”, നിഷികാന്ത് ദുബെ പറഞ്ഞു. എന്നാല്‍ ഏത് അന്വേഷണ ഏജന്‍സിക്കാണ് വിവരങ്ങള്‍ കൈമാറിയതെന്ന് വ്യക്തമല്ല.
അദാനി ഗ്രൂപ്പിനെയും പ്രധാനമന്ത്രി നരേന്ദ്ര മോദിയെയും ലക്ഷ്യമിട്ട് വ്യവസായി ദര്‍ശന്‍ ഹിരാനന്ദാനിയുടെ നിര്‍ദേശ പ്രകാരം ലോക്സഭയില്‍ ചോദ്യങ്ങള്‍ ചോദിച്ചതിന് കൈക്കൂലിയും ആനുകൂല്യങ്ങളും സ്വീകരിച്ചുവെന്നുമാണ് തൃണമൂല്‍ എംപി മഹുവ മൊയ്ത്രയ്‌ക്കെതിരായ ആരോപണം. വിഷയത്തില്‍ എംപിക്ക് പണവും മറ്റ് ആനുകൂല്യങ്ങളും സമ്മാനങ്ങളും നല്‍കാന്‍ താന്‍ നിര്‍ബന്ധിതനായിരുന്നതായും പാര്‍ലമെന്റ് വെബ്‌സൈറ്റില്‍ മഹുവയ്ക്ക വേണ്ടി ചോദ്യങ്ങള്‍ തയ്യാറാക്കി നല്‍കിയിരുന്നതായും കാട്ടി ദര്‍ശന്‍ ഹിരാനന്ദാനി പാര്‍ലമെന്റ് എത്തിക്സ് കമ്മിറ്റിക്ക് മുന്‍പില്‍ സത്യവാങ്മൂലം സമര്‍പ്പിച്ചിരുന്നു. ഇതിന് പിന്നാലെയാണ് കൂടുതല്‍ ആരോപണവുമായി ബിജെപി എംപി രംഗത്തെത്തിയിരിക്കുന്നത്.
ലോക്സഭയുടെ എത്തിക്സ് കമ്മറ്റി നിഷികാന്ത് ദുബെയുടെ പരാതി പരിശോധിച്ചു വരികയാണെന്നും മൊഴി രേഖപ്പെടുത്തുന്നതിനായി ഒക്ടോബര്‍ 26ന് ഹാജരാകാന്‍ ആവശ്യപ്പെടുകയും ചെയ്തിട്ടുണ്ടെന്നാണ് വിവരം.
Discussion about this post