ന്യൂഡൽഹി: മുതിർന്ന കോൺഗ്രസ് നേതാവും ഉത്തരാഖണ്ഡ് മുൻ മുഖ്യമന്ത്രിയുമായ ഹരീഷ് റാവത്തിന് കാറപകടത്തിൽ പരിക്ക്. കഴിഞ്ഞ രാത്രി കാശിപൂരിൽ വെച്ച് റാവത്ത് സഞ്ചരിച്ച കാർ ഡിവൈഡറിൽ ഇടിക്കുകയായിരുന്നു. കാശിപൂരിൽ നിന്നും ഹൽദ്വാനിയിലേക്കുള്ള യാത്രക്കിടെയായിരുന്നു അപകടം.
അപകടത്തിൽ ഹരീഷ് റാവത്തിന്റെ നെഞ്ചിന് പരിക്കേറ്റു. അദ്ദേഹത്തിന്റെ സുരക്ഷാ ഉദ്യോഗസ്ഥർക്കും സഹായികൾക്കും അപകടത്തിൽ പരിക്കേറ്റിട്ടുണ്ട്. കൈക്കും തലയ്ക്കുമാണ് ഇവർക്ക് പരിക്ക്.
അപകടത്തെ തുടർന്ന് ആശുപത്രിയിൽ പ്രവേശിപ്പിച്ച റാവത്തിനെ സ്കാനിംഗിനും മറ്റ് പരിശോധനകൾക്കും വിധേയനാക്കി. അദ്ദേഹം അപകടനില തരണം ചെയ്തതായി ഡോക്ടർമാർ അറിയിച്ചു. എന്നാൽ അദ്ദേഹത്തിന്റെ ഡ്രൈവറുടെയും ഗണ്മാന്റെയും പരിക്ക് ഗുരുതരമാണ് എന്നാണ് വിവരം.
പുലർച്ചെ 12.15 ഓടെയായിരുന്നു അപകടം. അപകടത്തിൽ പെട്ട കാർ നിശ്ശേഷം തകർന്നതായാണ് റിപ്പോർട്ട്.
