കൊച്ചി: സുരേഷ് ഗോപിക്ക് പിന്തുണയുമായി കൂടുതൽ ചലച്ചിത്ര പ്രവർത്തകർ. യുവസംവിധായകനും ദേശീയ അവാർഡ് ജേതാവുമായ വിഷ്ണു മോഹൻ സ്വന്തം വിവാഹ വീഡിയോ ആണ് സുരേഷ് ഗോപിയെ പിന്തുണയ്ക്കാൻ സമൂഹമാദ്ധ്യമങ്ങളിൽ പോസ്റ്റ് ചെയ്തത്.
സെപ്തംബർ ആദ്യം വിഷ്ണുവിന്റെയും അഭിരാമിയുടെയും വിവാഹത്തിൽ പങ്കെടുത്ത സുരേഷ് ഗോപിയുടെ ദൃശ്യങ്ങളാണിത്. മണ്ഡപത്തിലെത്തിയ സുരേഷ് ഗോപി കാലിൽതൊട്ടുവണങ്ങിയ അഭിരാമിയെ തലയിൽ തൊട്ട് അനുഗ്രഹിച്ച ശേഷം സ്നേഹപൂർവ്വം ചേർത്തുനിർത്തുന്നതും കാണാം.
ബിജെപി നേതാവ് കൂടിയായ എഎൻ രാധാകൃഷ്ണന്റെ മകളാണ് അഭിരാമി. കോഴിക്കോട് മാദ്ധ്യമപ്രവർത്തകരുടെ ചോദ്യങ്ങൾക്ക് മറുപടി പറയവേ മീഡിയ വൺ ലേഖികയുടെ തോളിൽ സ്നേഹപൂർവ്വം കൈവെച്ച സുരേഷ് ഗോപിയെ വ്യക്തിഹത്യ നടത്താനുളള രാഷ്ട്രീയ നീക്കത്തിന്റെ പശ്ചാത്തലത്തിലാണ് വിഷ്ണു മോഹൻ പിന്തുണയുമായി വീഡിയോ പങ്കുവെച്ചത്. രാഷ്ട്രീയ വിരോധത്തിൽ ഊതിപ്പെരുപ്പിച്ച സംഭവത്തിൽ സുരേഷ് ഗോപിക്ക് വലിയ പിന്തുണയാണ് ലഭിക്കുന്നത്.
സിനിമയിൽ ഉൾപ്പെടെ സജീവമായ മിമിക്രി താരങ്ങളുടെ സംഘടനയും സുരേഷ് ഗോപിക്ക് പിന്തുണയുമായി രംഗത്തെത്തിയിരുന്നു. നടൻ ബാബു രാജ് ഉൾപ്പെടെയുളളവരും സുരേഷ് ഗോപിക്ക് സമൂഹമാദ്ധ്യമങ്ങളിലൂടെ പിന്തുണ അറിയിച്ചിരുന്നു.
സുരേഷ് ഗോപി മാപ്പ് പറയണമെന്ന് മാത്രമായിരുന്നു പരാതിക്കാരിയുടെയും പത്രപ്രവർത്തക യൂണിയന്റെയും ആവശ്യം. എന്നാൽ അദ്ദേഹം ക്ഷമ പറഞ്ഞിട്ടും ലേഖിക പോലീസിൽ പരാതി നൽകുകയായിരുന്നു. മീഡിയവണ്ണിന്റെ രാഷ്ട്രീയ വിരോധവും ഇടത് സമ്മർദ്ദവും പരാതിക്ക് പിന്നിലുണ്ടെന്നാണ് റിപ്പോർട്ടുകൾ.
Discussion about this post