തിരുവനന്തപുരം; കേരള പോലീസിന് നേരെ സൈബർ ആക്രമണവുമായി അജ്ഞാതർ. പോലീസിന്റെ പ്രധാന കംപ്യൂട്ടറുകളിലെയും പോലീസ് ആപ്ലിക്കേഷനുകളുടെയും യൂസർനെയിം, പാസ്വേർഡുകൾ, ഇ-മെയിൽ വിലാസങ്ങൾ എന്നിവ ഹാക്ക് ചെയ്യപ്പെട്ടു.സെപ്റ്റംബർ 9ന് മുൻപുള്ള ഏതോ ദിവസമാണ് സൈബർ ആക്രമണവും വിവര ചോർച്ചയും ഉണ്ടായതെന്നാണ് പോലീസിന്റെ കണ്ടെത്തൽ. ഒന്നരമാസത്തിന് ശേഷമാണ് ഹാക്കിംഗ് പോലീസ് തിരിച്ചറിഞ്ഞത്.
എറണാകുളം സിറ്റി നോർത്ത് സ്റ്റേഷനിലെ കമ്പ്യൂട്ടർ ശൃംഖലയും ഹാക്ക് ചെയ്യപ്പെട്ടവയിലുണ്ട്. കമ്പ്യൂട്ടറുകളിൽ ഉണ്ടായിരുന്ന എല്ലാ ആപ്പുകളുടെയും യൂസർ നെയിമും പാസ്വേഡും ഇ-മെയിൽ വിലാസങ്ങളും ഹാക്കർമാർ ചോർത്തി.പോൽ ആപ്പ്, ക്രൈം ഡ്രൈവ്, ഡയൽ എ കോപ്പ്, ഐ-ആപ്‌സ്, ക്രൈം ആൻഡ് ക്രിമിനൽ ട്രാക്കിങ് ആൻഡ് നെറ്റ് വർക്കിങ് (സിസിടിഎൻഎസ്) എന്നീ പ്രധാനപ്പെട്ട ആപ്ലിക്കേഷനുകളുടെ വിവരങ്ങൾ ചോർന്നു. പൊലീസ് ഉദ്യോഗസ്ഥരുടെ ഔദ്യോഗിക വിവരങ്ങളുള്ള സ്പാർക്കിൽ നിന്നുള്ള വിവരങ്ങളും ചോർത്തിയിട്ടുണ്ട്.
സൈബർ സെക്യൂരിറ്റി വിഭാഗം നടത്തിയ പരിശോധനയിലാണ് നോർത്ത് സ്റ്റേഷനിലെ കമ്പ്യൂട്ടർ ഹാക്ക് ചെയ്ത വിവരം ശ്രദ്ധയിൽപെടുന്നത്. കൂടുതൽ പരിശോധനയിലാണ് മറ്റു സ്റ്റേഷനുകളിലും സമാനമായ സംഭവം കണ്ടെത്തിയത്.
