കോഴിക്കോട്; കോഴിക്കോട് നഗരത്തിന് അന്താരാഷ്ട്ര അംഗീകാരം. കോഴിക്കോട് നഗരത്തിന് യുനസ്കോ സാഹിത്യനഗരം പദവിയാണ് ലഭിച്ചത്. അംഗീകാരം ലഭിക്കുന്ന രാജ്യത്തെ ഏക നഗരമാണ് കോഴിക്കോട്. സാഹിത്യത്തിന് നൽകിയ സംഭാവനകൾ പരിഗണിച്ചാണ് അംഗീകാരം. കോഴിക്കോട് കോർപ്പറേഷന്റെ രണ്ട് വർഷത്തെ പരിശ്രമത്തിനൊടുവിലാണ് അംഗീകാരം ലഭിച്ചത്. സംഗീതനഗരമായി ഗ്വാളിയോർ കോർപ്പറേഷനും അംഗീകാരം ലഭിച്ചിട്ടുണ്ട്. പുതുതായി തിരഞ്ഞെടുത്ത 55 നഗരങ്ങളിലാണ് കോഴിക്കോട് ഇടംപിടിച്ചിരിക്കുന്നത്.
ഈ കഴിഞ്ഞ ജൂണിലാണ് യുനസ്കോയുടെ സാഹിത്യനഗരപദവി നേടാനായി കോർപ്പറേഷൻ അപേക്ഷ നൽകിയത്. രാഷ്ട്രീയ ഭേദമന്യേ ഒറ്റക്കെട്ടായുള്ള കോഴിക്കോട് കോർപ്പറേഷന്റെ ശ്രമങ്ങൾക്കൊപ്പം കേന്ദ്രമന്ത്രി വി. മുരളീധരൻ ശക്തമായി നിലയുറപ്പിച്ചതോടയാണ് കേന്ദ്ര അംഗീകാരം പെട്ടെന്ന് തന്നെ ലഭിച്ചത്. കേന്ദ്രമന്ത്രി വി. മുരളീധരൻ, കേന്ദ്ര വിദ്യാഭ്യാസ സാംസ്കാരികമന്ത്രാലയം, കേന്ദ്രസാഹിത്യ അക്കാഡമി പ്രതിനിധികൾ എന്നിവരുമായി മേയർ ഡോ. ബീന ഫിലിപ്പിന്റെ നേതൃത്വത്തിൽ കൂടിക്കാഴ്ച നടത്തുകയും കോഴിക്കോടിന്റെ ആവശ്യം അറിയിക്കുകയും ചെയ്തിരുന്നു.
