മുംബൈ : ബോളിവുഡില് നിന്നും മറ്റൊരു ബയോപിക് കൂടി പുറത്ത് വരുന്നു. മുന് പ്രധാനമന്ത്രി അടല് ബിഹാരി വാജ്പേയിയുടെ ജീവിതമാണ് ഇത്തവണ അഭ്രപാളികളില് പകര്ത്തുന്നത്. പ്രശസ്ത നടന് പങ്കജ് ത്രിപാഠിയാണ് മുന് പ്രധാനമന്ത്രിയായി എത്തുന്നത്. രവി ജാഥവ് ആണ് ചിത്രം സംവിധാനം ചെയ്യുന്നത്. ചിത്രം ഡിസംബറില് റിലീസ് ചെയ്യുമെന്ന് അണിയറ പ്രവര്ത്തകര് പറഞ്ഞു.
മുന് പ്രധാനമന്ത്രിയെ അവതരിപ്പിക്കാന് കുറേയധികം തയ്യാറെടുപ്പുകള് നടത്തയതായി പങ്കജ് ത്രപാഠി വ്യക്തമാക്കുന്നു. ഫിലിം കമ്പാനിയനുമായി അടുത്തിടെ ഒരു അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. ‘അടലില്, ഞാന് ഏകദേശം 60 ദിവസം ഷൂട്ടില് ഉണ്ടായിരുന്നു. ആ 60 ദിവസം ഞാന് കിച്ചടി മാത്രമാണ് കഴിച്ചത്, അതും ഞാന് പാകം ചെയ്തതാണ്’, അദ്ദേഹം വ്യക്തമാക്കി.
‘മറ്റുള്ളവര് എനിക്ക് വേണ്ട ഭക്ഷണം എങ്ങനെയാണ് തയ്യാറാക്കുന്നതെന്ന് അറിയാന് പറ്റില്ലല്ലോ. അതാണ് അതിന് ആളെ വയ്ക്കാത്തത്. ഞാന് എന്റെ ഭക്ഷണത്തില് കൂടുതലായി എണ്ണയോ മസാലയോ ഉപയോഗിക്കാറില്ല. ഞാന് ലളിതമായ പരിപ്പ്, ചോറ്, നാടന് പച്ചക്കറികള് എന്നിവ മാത്രമാണ് ഉപയോഗിക്കുന്നത്. അത് പുറത്ത് നിന്നുള്ള ഭക്ഷണത്തില് ശരിയായ രീതിയില് കിട്ടില്ല’, പങ്കജ് ത്രിപാഠി കൂട്ടിച്ചേര്ത്തു.
താനിപ്പോള് സാത്വിക ഭക്ഷണം മാത്രമാണ് കഴിക്കുന്നത്. തനിക്കത് വളരെയധികം ഉപകാരപ്പെടുന്നുണ്ട്. മോശം ഭക്ഷണം കഴിച്ച് ഒരു നടന് അയാള് അവതരിപ്പിക്കുന്ന കഥാപാത്രത്തിന്റെ വികാരം കൃത്യമായി അവതരിപ്പിക്കാന് കഴിയുമെന്ന് കരുതുന്നില്ല. അതിനാലാണ് താന് സ്വയം പാചകം ചെയ്ത് കഴിക്കുന്നതെന്നും അദ്ദേഹം വ്യക്തമാക്കി.
