വാഷിംഗ്ടൺ, : അടുത്തയാഴ്ച ന്യൂഡൽഹിയിൽ നടക്കാനിരിക്കുന്ന സുപ്രധാന 2 + 2 നയതന്ത്ര ഇടപെടലിൽ ഉന്നത യു എസ് പ്രതിനിധി സംഘം പങ്കെടുക്കും. യു എസ് സ്റ്റേറ്റ് സെക്രട്ടറി ആന്റണി ബ്ലിങ്കന്റെ നേതൃത്വത്തിലുള്ള സംഘമാണ് ഇന്ത്യയിൽ നടക്കുന്ന നയതന്ത്ര ചർച്ചയുടെ ഭാഗമാകുന്നത്. കൂടാതെ യു എസ് പ്രതിരോധ സെക്രട്ടറി ലോയ്ഡ് ജെ ഓസ്റ്റിൻ III ഉം ചർച്ചയിൽ പങ്കെടുക്കുമെന്നു യു എസ് സ്റ്റേറ്റ് ഡിപ്പാർട്മെൻറ് ഔദ്യോഗിക പ്രസ്താവനയിൽ അറിയിച്ചു.
ഡൽഹിയിൽ വെച്ച് നടക്കാനിരിക്കുന്ന ചർച്ചയിൽ ഇൻഡോ-പസഫിക് മേഖലയിൽ നടക്കുന്ന സംഭവവികാസങ്ങൾക്ക് പ്രത്യേക ഊന്നൽ നനൽകും. സുപ്രധാനമായ ആഗോള വിഷയങ്ങളും, യു എസ് – ഇന്ത്യ നയതന്ത്രതല സംഭാഷണങ്ങൾക്കും ചർച്ച വേദിയാകും. യുഎസ് സ്റ്റേറ്റ് സെക്രട്ടറി ബ്ലിങ്കനും പ്രതിരോധ സെക്രട്ടറി ഓസ്റ്റിനും ഇന്ത്യൻ വിദേശകാര്യ മന്ത്രി എസ് ജയശങ്കർ, പ്രതിരോധ മന്ത്രി രാജ്നാഥ് സിങ് എന്നിവരുമായി കൂടിക്കാഴ്ച നടത്തും.
ഉഭയകക്ഷി ബന്ധം ശക്തിപ്പെടുത്തുക, ആഗോള ആശങ്കകൾ പരിഹരിക്കുക, ഇന്തോ-പസഫിക്കിലെ സഹകരണം പ്രോത്സാഹിപ്പിക്കുക തുടങ്ങി വിവിധ വിഷയങ്ങൾ ചർച്ചകളിൽ ഉൾപ്പെടുമെന്ന് പ്രതീക്ഷിക്കുന്നു. ഇന്ത്യൻ പ്രതിരോധ സേനയ്ക്ക് 31 MQ-9B പ്രിഡേറ്റർ ഡ്രോണുകൾ വിതരണം ചെയ്യുന്നതുമായി ബന്ധപെട്ടു ഇന്ത്യയും യുഎസും അടുത്തിടെ 3 ബില്യൺ യുഎസ് ഡോളറിന്റെ കരാറിലേർപ്പെട്ടിരുന്നു .
Discussion about this post