മുഖ്യമന്ത്രീ, ആദിവാസികൾ കാഴ്ച മൃഗങ്ങളല്ല, കാഴ്ചവസ്തുക്കളും….; കേരളീയത്തിൽ ആദിവാസികളെ പ്രദർശന വസ്തുവാക്കിയ സംഭവത്തിൽ പി ശ്യാംരാജിന്റെ തുറന്നെഴുത്ത്

തിരുവനന്തപുരം; കേരളീയം വേദിയിൽ ആദിവാസി വിഭാഗങ്ങളെ പ്രദർശന വസ്തുവാക്കിയ സംഭവത്തിൽ തുറന്നെഴുത്തുമായി യുവമോർച്ച ദേശീയ സെക്രട്ടറി പി ശ്യാംരാജ്. സമൂഹമാദ്ധ്യമങ്ങളിലടക്കം ഇക്കാര്യം സജീവ ചർച്ചയാവുകയും വ്യാപക പ്രതിഷേധം ഉയരുകയും ചെയ്തതിന് പിന്നാലെയാണ് ശ്യാംരാജ് സമൂഹമാദ്ധ്യമങ്ങളിലൂടെ ആദിവാസി വിഭാഗങ്ങളെ അപമാനിക്കരുതെന്ന് അഭ്യർത്ഥിച്ച് പ്രതികരിച്ചത്. മുഖ്യമന്ത്രീ, ആദിവാസികൾ കാഴ്ച മൃഗങ്ങളല്ല, കാഴ്ചവസ്തുക്കളും… എന്ന ഓർമ്മപ്പെടുത്തലോടെയാണ് ഫേസ്ബുക്ക് കുറിപ്പ് ആരംഭിക്കുന്നത്.

ഇടുക്കി ജില്ലയിലെ തൊടുപുഴയിൽ നിന്നുമുള്ള ഊരാളി സമുദായാംഗങ്ങളെ ഉൾപ്പെടെയാണ് കേരളീയം പരിപാടിയുടെ പേരിൽ തിരുവനന്തപുരം കനകക്കുന്നിൽ ഇങ്ങനെ അണിയിച്ചൊരുക്കി നിർത്തിയിരിക്കുന്നതെന്ന് ശ്യാംരാജ് ചൂണ്ടിക്കാട്ടി. ആദിവാസിയുടെ കുടിലുകളും, ഏറുമാടങ്ങളും കൗതുകമുണർത്തുന്നു പോലും! ആ കൗതുകം കാണാൻ നിങ്ങൾ അവിടങ്ങളിൽ പോകണം, അല്ലാതെ തലസ്ഥാന നഗരിയിൽ പ്രദർശന വസ്തുക്കളാക്കുകയല്ല ചെയ്യേണ്ടതെന്ന് ശ്യാംരാജ് പറഞ്ഞു.

കേരളത്തിലെ ഏതു ഗോത്രവർഗ വിഭാഗങ്ങളാണ് നിങ്ങളുടെ സങ്കൽപത്തിൽ നിങ്ങൾ രചിച്ച കഥകളിലെപ്പോലെ വസ്ത്രം ധരിച്ച് നടക്കുന്നത്? ഗുഹാ നിവാസികളായിട്ടുള്ള ചോലനായ്ക്കർ വിഭാഗത്തിൽ നിന്നും ജവറ ചെയ്യുന്ന വിനോദും, സ്വാതന്ത്ര്യ സമരവീരനായിരുന്ന തലയ്ക്കൽ ചന്തുവിന്റെ പിന്മുറക്കാരനായ പള്ളിയറ രാമേട്ടനുമെല്ലാം പ്രതിനിധാനം ചെയ്യുന്നൊരു സമൂഹത്തെ ഇന്നും ഇലയും മരത്തോലും ധരിച്ച്, കൂവി നടക്കുന്നൊരു സമൂഹമായി കേരളത്തിന് മുന്നിൽ അവതരിപ്പിക്കുന്നത് ആരുടെ താത്പര്യത്തിനനുസരിച്ചാണ്?

ഏതൊരു വ്യക്തിക്കും,സമൂഹത്തിനും ആത്മാഭിമാനം എന്നൊന്നുണ്ട്. നിങ്ങളുടെ അധികാരം അതിനെ മുറിപ്പെടുത്താനുള്ള ലൈസൻസല്ല. കേരളത്തിലെ ആദിവാസികൾക്ക് മഹത്തായൊരു ചരിത്രമുണ്ട്.
തലമുറകൾ നീണ്ട പോരാട്ടത്തിന്റെ, നവോത്ഥാനത്തിന്റെ, ആത്മാഭിമാനത്തിന്റെ ചരിത്രം.
ആ ചരിത്രം മറച്ചുവച്ച് ദളിത്-ആദിവാസി സമൂഹങ്ങളെ അപകർഷതാബോധത്തിലേക്ക് തള്ളിവിടാനുള്ള നിങ്ങളുടെ ശ്രമങ്ങൾക്ക് തിരിച്ചടി നൽകുക തന്നെ ചെയ്യുമെന്ന മുന്നറിയിപ്പോടെയാണ് ശ്യാംരാജിന്റെ പ്രതികരണം അവസാനിക്കുന്നത്.

ഇടുക്കിയിലെ പിന്നാക്ക മേഖലയിൽ നിന്ന് വിദ്യാർത്ഥി രാഷ്ട്രീയത്തിലൂടെ ദേശീയ തലത്തിലേക്ക് ഉയർന്ന യുവനേതാവാണ് ശ്യാംരാജ്. കേരളീയത്തിന്റെ ഭാഗമായി ഫോക് ലോർ അക്കാദമി ഒരുക്കിയ ആദിമം ലിവിങ് മ്യൂസിയത്തിന്റെ ഭാഗമായിട്ടാണ് ആദിവാസി വിഭാഗങ്ങളെ പരമ്പരാഗത വസ്ത്രങ്ങളണിഞ്ഞ് കുടിലുകൾക്ക് മുൻപിൽ പ്രദർശിപ്പിച്ചിരിക്കുന്നത്.