ന്യൂഡൽഹി: പ്രധാനമന്ത്രി നരേന്ദ്രമോദിക്കെതിരായ സോഷ്യൽ മീഡിയ പോസ്റ്റുകളിൽ ആം ആദ്മി പാർട്ടിക്കെതിരെ തിരഞ്ഞെടുപ്പ് കമ്മീഷൻ നോട്ടീസ്. പ്രധാനമന്ത്രിക്കെതിരായി അപകീർത്തികരമായ പരാമർശം നടത്തിയതിനാണ് ആം ആദ്മി പാർട്ടിക്ക് തിരഞ്ഞെടുപ്പ് കമ്മീഷൻ ചൊവ്വാഴ്ച നോട്ടീസ് അയച്ചത്. സാമൂഹ്യ മാദ്ധ്യമമായ എക്സിൽ ആം ആദ്മി പാർട്ടി ഷെയർ ചെയ്ത പോസ്റ്റുകൾ സംബന്ധിച്ച് ബിജെപിയിൽ നിന്ന് നവംബർ 10 ന് പരാതി ലഭിച്ചതായി തിരഞ്ഞെടുപ്പ് കമ്മീഷൻ പറഞ്ഞു. ഈ പോസ്റ്റുകളിലൂടെ പ്രധാനമന്ത്രിയെ അപകീർത്തികരമായ രീതിയിൽ ചിത്രീകരിച്ചിരിക്കുന്നുവെന്ന് ബി ജെ പി ആരോപിച്ചു.
പ്രധാനമന്ത്രിയും വ്യവസായി ഗൗതം അദാനിയും തമ്മിൽ ബന്ധമുണ്ടെന്ന് ആരോപിച്ച എഎപിയുടെ സോഷ്യൽ മീഡിയ പോസ്റ്റുകളാണ് വിവാദമായത്. തിരഞ്ഞെടുപ്പ് പ്രചാരണത്തിന്റെ അന്തസ്സ് നിലനിർത്താനും, മാന്യതയുടെ പരിധികൾ ലംഘിക്കുന്നത് ഒഴിവാക്കാനും, രാഷ്ട്രീയ എതിരാളികളുടെ വ്യക്തിപരമായ സ്വഭാവത്തിനും പെരുമാറ്റവുമായി ബന്ധപ്പെട്ട ആക്രമണങ്ങളിൽ നിന്ന് വിട്ടുനിൽക്കാനും എല്ലാ രാഷ്ട്രീയ പാർട്ടികൾക്കും നിരന്തരം ഉപദേശങ്ങൾ നൽകിയിട്ടുണ്ട്” തിരഞ്ഞെടുപ്പ് കമ്മീഷൻ പറഞ്ഞു. കൂടാതെ ആരോപണ വിധേയമായ പോസ്റ്റുകൾ ആം ആദ്മി പാർട്ടിയുടെ ഔദ്യോഗിക അക്കൌണ്ടിൽ നിന്നാണെന്ന് കണ്ടെത്തിയതായും കമ്മീഷൻ പറഞ്ഞു.
“ഒരു ദേശീയ പാർട്ടി എന്ന നിലയ്ക്ക് പൊതു ഡൊമെയ്‌നിൽ വസ്തുതകൾ പ്രസിദ്ധീകരിക്കുമ്പോൾ ജാഗ്രത പാലിക്കണം. മാതൃകാ പെരുമാറ്റച്ചട്ടത്തിലെ വ്യവസ്ഥകൾ ആം ആദ്മി പാർട്ടി ലംഘിച്ചതായും കമ്മീഷൻ ചൂണ്ടിക്കാട്ടി. നവംബർ 16നകം സംഭവത്തിൽ വിശദീകരണം നൽകണമെന്ന് എഎപി കൺവീനർ അരവിന്ദ് കെജരിവാളിനോട് തിരഞ്ഞെടുപ്പ് കമ്മീഷൻ ആവശ്യപ്പെട്ടു.
