തൃശൂര് : ചാവക്കാട് ബ്ലാങ്ങാട് ബീച്ചിലെ ഫ്ളോട്ടിംഗ് ബ്രിഡ്ജ് തകര്ന്നു. തിരക്ക് കുറവായതിനാല് വന് അപകടമാണ് തലനാരിഴയ്ക്ക് ഒഴിവായത്. ഇന്നലെ ഉച്ചയോടെയായിരുന്നു സംഭവം.
നൂറു മീറ്റര് നീളത്തിലുള്ള ഫ്ളോട്ടിംഗ് ബ്രിഡ്ജാണ് ബീച്ചിലുള്ളത്. ഇതിന്റെ മധ്യഭാഗത്ത് 10 മീറ്ററോളമാണ് വേര്പെട്ടത്. 2 സഞ്ചാരികളും 6 ജീവനക്കാരും ഉള്പ്പെടെ എട്ട് പേര് സംഭവ സമയം ബ്രിഡ്ജില് ഉണ്ടായിരുന്നു. സഞ്ചാരികളില് ഒരാള് നിയന്ത്രണം വിട്ട് വെള്ളത്തിലേക്ക് വീണു. ഉടനെ മറ്റുള്ളവര് ചേര്ന്ന് രക്ഷിക്കുകയായിരുന്നു. ശക്തമായ തിരയിലാണ് ബ്രിഡ്ജ് തകര്ന്നത് എന്നാണ് സൂചന.
ഇളകിപ്പോയ ഭാഗം നടത്തിപ്പുകാരായ സ്വകാര്യ കമ്പനിയാണ് കഷ്ണങ്ങളാക്കി തീരത്തേക്ക് കയറ്റിയത്. ട്രാക്ടര് ഉപയോഗിച്ചാണ് ഓരോ കഷ്ണങ്ങളും കയറ്റിയത്. അവധി ദിവസമല്ലാത്തതിനാല് സന്ദര്ശകരുടെ തിരക്ക് കുറവായിരുന്നു. ഇതാണ് അപകടത്തിന്റെ ആഘാതം കുറച്ചത്.
തീരദേശ ടൂറിസം പ്രോത്സാഹിപ്പിക്കാന് ടൂറിസം വകുപ്പിന്റെ ഡെസ്റ്റിനേഷന് മാനേജ്മെന്റ് കൗണ്സിലാണ് ഫ്ളോട്ടിംഗ് ബ്രിഡ്ജ് നടപ്പിലാക്കിയത്. രണ്ട് മാസം മുന്പായിരുന്നു ഉദ്ഘാടനം. ഒക്ടോബര് ഒന്നിന് മന്ത്രി പി.എ. മുഹമ്മദ് റിയാസാണ് ഫ്ളോട്ടിംഗ് ബ്രിഡ്ജ് ഉദ്ഘാടനം ചെയ്തത്.
ബീച്ച് ബ്രദേഴ്സ് ചാവക്കാട് (ബിബിസി) എന്ന സ്വകാര്യ കമ്പനിയാണ് നിര്മ്മാതാക്കള്. 80 ലക്ഷം രൂപ നിര്മാണ ചിലവിലാണ് കമ്പനി ഇത് നിര്മ്മിച്ചത്. ഒരേ സമയം നൂറ് പേര്ക്ക് ബ്രിഡ്ജില് പ്രവേശിക്കാവുന്ന രീതിയിലാണ് രൂപകല്പന. 100 മീറ്റര് കടലിലേക്ക് പാലത്തിലൂടെ നടക്കാവുന്ന വിധമാണിത്. തിരയ്ക്കനുസരിച്ച് ബ്രിഡ്ജ് ഉയരുകയും താഴുകയും ചെയ്യും. പാലത്തില് ഒരാള്ക്ക് 120 രൂപയാണ് പ്രവേശന ഫീസ്. ചാവക്കാടിന് പുറമേ കാസര്കോട്, കണ്ണൂര്, കോഴിക്കോട്, മലപ്പുറം എന്നീ ജില്ലകളില് നിലവില് ഫ്ളോട്ടിംഗ് ബ്രിഡ്ജ് പ്രവര്ത്തിക്കുന്നുണ്ട്.
