ന്യൂഡൽഹി; പ്രകടന മികവിന്റെ രാഷ്ട്രീയത്തിനാണ് പുതിയ ഇന്ത്യ വോട്ടു കുത്തിയതെന്ന് കേന്ദ്ര ആഭ്യന്തരമന്ത്രി അമിത് ഷാ. മോദി ജി ജനങ്ങളുടെ ഹൃദയങ്ങളിലാണ്. പ്രീണന രാഷ്ട്രീയത്തിന്റെയും ജാതി രാഷ്ട്രീയത്തിന്റെയും കാലം അവസാനിച്ചുവെന്നാണ് ഇന്നത്തെ തിരഞ്ഞെടുപ്പ് ഫലം തെളിയിക്കുന്നതെന്നും അമിത് ഷാ കൂട്ടിച്ചേർത്തു.
രണ്ട് സംസ്ഥാനങ്ങളിൽ ബിജെപി ഭരണം പിടിക്കുകയും മദ്ധ്യപ്രദേശിൽ തുടർഭരണം നേടുകയും ചെയ്തതിന് പിന്നാലെ എക്സിലൂടെ ആയിരുന്നു അമിത് ഷായുടെ പ്രതികരണം. ബിജെപിയെ തിരഞ്ഞെടുത്ത മദ്ധ്യപ്രദേശിലെയും രാജസ്ഥാനിലെയും ഛത്തീസ്ഗഢിലെയും ജനങ്ങൾക്ക് അദ്ദേഹം നന്ദി രേഖപ്പെടുത്തി.
ജനങ്ങളുടെ വലിയ പിന്തുണയാണ് ലഭിച്ചത്. അവരെ സല്യൂട്ട് ചെയ്യുന്നു. തിരഞ്ഞെടുപ്പ് വിജയമറിഞ്ഞ് പ്രധാനമന്ത്രി നരേന്ദ്രമോദിയെ ഒട്ടേറെ പേരാണ് അഭിനന്ദിക്കുന്നതെന്നും അമിത് ഷാ കൂട്ടിച്ചേർത്തു. ബിജെപിക്ക് പ്രോത്സാഹനം നൽകുന്ന പിന്തുണ നൽകിയതിന് തെലങ്കാനയിലെ ജനങ്ങൾക്കും അദ്ദേഹം നന്ദി പറഞ്ഞു.
നരേന്ദ്രമോദിയുടെ നേതൃത്വത്തിൽ തെലങ്കാനയുടെ വികസനത്തിനായി ബിജെപി എന്നും പരിശ്രമിച്ചുകൊണ്ടിരിക്കുമെന്നും അദ്ദേഹം ജനങ്ങൾക്ക് ഉറപ്പ് നൽകി. തെലങ്കാനയെ അഭിവൃദ്ധിപ്പെടുന്ന ഒരു സംസ്ഥാനമാക്കി മാറ്റുമെന്നും അദ്ദേഹം പറഞ്ഞു. ബിജെപിക്ക് വേണ്ടി പ്രവർത്തിച്ച എല്ലാ കാര്യകർത്താക്കൾക്കും ഹൃദയം നിറഞ്ഞ നന്ദി പറയുന്നതായും അദ്ദേഹം കൂട്ടിച്ചേർത്തു. വൈകിട്ട് ബിജെപി ആസ്ഥാനത്ത് നടന്ന വിജയാഘോഷത്തിൽ പ്രധാനമന്ത്രി നരേന്ദ്രമോദിക്കും രാജ്നാഥ് സിംഗിനും ബിജെപി ദേശീയ അദ്ധ്യക്ഷൻ ജെപി നദ്ദയ്ക്കുമൊപ്പവും അമിത് ഷാ പങ്കെടുത്തിരുന്നു.
Discussion about this post