പത്തനംതിട്ട : അമിത വേഗതയിൽ പാഞ്ഞെത്തിയ കാറിടിച്ച് തൊഴിലുറപ്പ് തൊഴിലാളിയായ വീട്ടമ്മയ്ക്ക് ദാരുണാന്ത്യം. തിരുവല്ല-അമ്പലപ്പുഴ സംസ്ഥാനപാതയിലെ നെടുമ്പ്രത്താണ് നിയന്ത്രണം നഷ്ടപ്പെട്ട കാറിടിച്ച് വീട്ടമ്മ മരിച്ചത്. തൊഴിലുറപ്പ് ജോലിക്കിടെ ഉച്ചഭക്ഷണം കഴിച്ചു മടങ്ങുമ്പോൾ ആയിരുന്നു അപകടം നടന്നത്.
അമിത വേഗതയിൽ വന്ന കാർ 66 കാരിയായ വീട്ടമ്മയെ ഇടിച്ചുതെറിപ്പിക്കുകയായിരുന്നു. നെടുമ്പ്രം മാലിപ്പറമ്പിൽ വീട്ടിൽ ചെല്ലമ്മ (66) ആണ് മരിച്ചത്.
ശനിയാഴ്ച ഉച്ചകഴിഞ്ഞ് 2 മണിയോടെ നെടുമ്പ്രം വാട്ടർ അതോറിറ്റി ഓഫീസിന് മുമ്പിൽ വച്ചാണ് അപകടം സംഭവിച്ചത്.
നീരേറ്റുപുറം ഭാഗത്തുനിന്നും പൊടിയാടി ഭാഗത്തേക്ക് പോവുകയായിരുന്ന കാർ ആണ് അപകടം ഉണ്ടാക്കിയത്. സമീപപ്രദേശത്ത് നടന്നിരുന്ന തൊഴിലുറപ്പ് ജോലിയ്ക്കിടെ ഉച്ച ഭക്ഷണം കഴിക്കാൻ ആയി വീട്ടിലേക്ക് പോവുകയായിരുന്നു ചെല്ലമ്മ. ഗുരുതരമായി പരിക്കേറ്റ ചെല്ലമ്മയെ ഉടൻ തന്നെ തിരുവല്ല താലൂക്ക് ആശുപത്രിയിലും തുടർന്ന് ടി.എം.എം മെഡിക്കൽ മിഷൻ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.
Discussion about this post