കോഴിക്കോട്: തിക്കോടി കടലിന്റെ വെള്ളത്തിന്റെ നിറം ചുവപ്പായത് ജനങ്ങളിൽ ആശങ്ക സൃഷ്ടിച്ചു. ഒരാഴ്ച മുൻപാണ് തിക്കോടി കടലിൽ വെള്ളം അവസാനമായി നിറം മാറിയത്.കഴിഞ്ഞ മാസം 30 ന് വെള്ളത്തിന്റെ നിറം തവിട്ടായും മാറിയിരുന്നു
നിറവ്യത്യാസത്തിന് പിന്നിൽ പ്രത്യേക തരം ആൽഗയുടെ അമിത സാന്നിദ്ധ്യമെന്നാണ് വിവരം.കേരള ഫിഷറീസ് സമുദ്രപഠന സർവ്വകലാശാലയിലെ (കുഫോസ്) ശാസ്ത്രജ്ഞർ നടത്തിയ പഠനത്തിലാണ് ഡൈനോഫ്ളാജെല്ലേറ്റ് വിഭാഗത്തിൽപ്പെട്ട ജിമ്നോഡീനിയം ആൽഗയുടെ അമിത സാന്നിധ്യമാണ് കടൽവെള്ളത്തിന്റെ നിറം മാറ്റത്തിന് കാരണമെന്ന് കണ്ടെത്തിയത്.
കടൽ വെള്ളത്തിന്റെ നിറം ചുവപ്പ് കലർന്ന തവിട്ടുനിറമാകുന്നു എന്ന് മത്സ്യതൊഴിലാളികൾ അറിയിച്ചതിനെ തുടർന്നാണ് കുഫോസിലെ പോസ്റ്റ് ഡോക്ടറൽ ഗവേഷക ഡോ.പി.മിനു തിക്കോടി കടലിൽ പഠനം നടത്തിയത്.കുഫോസ് അക്വാട്ടിക് എൺവയോൺമെന്റ് മാനേജ്മെന്റ് വിഭാഗം അദ്ധ്യാപകൻ ഡോ.എംപി.പ്രഭാകരൻ പഠനത്തിന് നേതൃത്വം നൽകി. കുഫോസ് പയ്യന്നൂർ പ്രാദേശിക കേന്ദ്രത്തിലെ ഗവേഷക ഡോ. സി.വി. ആശ പഠനത്തിനാവശ്യമായ സഹായം നൽകി.
നിറം മാറ്റത്തിന് കാരണമായ ജിമ്നോഡീനിയം എന്ന ആൽഗയും വിഷാംശമുള്ളതാണ്. ജിമ്നോഡീനിയം ആൽഗ ഉദ്പാദിപ്പിക്കുന്ന ബ്രെവിടോക്സിൻ എന്ന വിഷം കല്ലുമ്മക്കായ, കക്ക, ചിപ്പി എന്നിവയുടെ തോടിൽ സംഭരിക്കപെടുകയും അവയിലൂടെ മനുഷ്യരിലെത്തുകയും ചെയ്യും. ഗുരുതരമല്ലെങ്കിലും വിവിധ തരത്തിലുള്ള ഉദരരോഗങ്ങൾക്ക് ഇത് കാരണമാകും
Discussion about this post