പനജി: ക്ഷേത്രങ്ങളുടെ വിശുദ്ധിയും മാന്യതയും നിലനിർത്തുന്നതിന് വേണ്ടി, ഭക്തജനങ്ങൾക്ക് ഡ്രസ് കോഡ് ഏർപ്പെടുത്താനൊരുങ്ങി ഗോവൻ ക്ഷേത്രനഗരമായ പോണ്ഡ. ജനുവരി 1 മുതൽ ഷോർട്ട്സ്, മിനി സ്കേർട്ട്സ്, സ്ലീവ്ലെസ്സ് ടോപ്പുകൾ, ഇറക്കം കുറഞ്ഞ ജീൻസുകൾ, മുറിക്കൈയ്യൻ ടീഷർട്ടുകൾ എന്നിവ ധരിച്ച് ക്ഷേത്രങ്ങളിൽ പ്രവേശിക്കാൻ ആകില്ല.
ഡ്രസ് കോഡ് പ്രകാരമുള്ള വസ്ത്രം ധരിക്കാതെ എത്തുന്നവർക്ക് താത്കാലികമായി ഉപയോഗിക്കാൻ മേൽക്കുപ്പായവും ലുങ്കിയും ക്ഷേത്രങ്ങളിൽ നിന്ന് തന്നെ വിതരണം ചെയ്യും. ഇവ ധരിച്ചുകൊണ്ട് ഭക്തജനങ്ങൾക്ക് ക്ഷേത്രദർശനം നടത്താവുന്നതാണ്. ഇതുമായി ബന്ധപ്പെട്ട് നിർദേശങ്ങൾ നോട്ടീസ് ബോർഡുകളിൽ പതിച്ചതായി ക്ഷേത്രം അധികൃതർ അറിയിച്ചു.
ക്ഷേത്രങ്ങളിൽ എത്തുന്ന വിനോദസഞ്ചാരികൾക്ക് ആചാരങ്ങളുടെ മൂല്യങ്ങൾ മനസ്സിലാക്കി കൊടുക്കുന്നതിന് കൂടി വേണ്ടിയാണ് തീരുമാനം. പലപ്പോഴും ക്ഷേത്രാചാരങ്ങൾക്ക് നിരക്കാത്ത വേഷവിധാനങ്ങളിൽ സഞ്ചാരികൾ എത്തുന്നത് പതിവാണെന്ന് ക്ഷേത്രം അധികൃതർ ചൂണ്ടിക്കാട്ടുന്നു. ഇത് പരിഹരിക്കാനാണ് പുതിയ തീരുമാനങ്ങൾ നടപ്പിലാക്കുന്നത്.
അതേസമയം, പത്ത് വയസ്സിൽ താഴെയുള്ള കുട്ടികൾക്ക് ഡ്രസ് കോഡ് ബാധകമായിരിക്കില്ല. ഡ്രസ് കോഡ് ഏർപ്പെടുത്താനുള്ള തീരുമാനം പുതിയതല്ലെന്നും നേരത്തേ ഉള്ളതാണെന്നും ഇത് കർശനമായി നടപ്പിലാക്കാനാണ് ഇപ്പോൾ തീരുമാനിച്ചിരിക്കുന്നതെന്നും ക്ഷേത്ര സംഘടനകൾ അറിയിച്ചു. ക്ഷേത്രങ്ങൾ സന്ദർശിക്കുന്ന സഞ്ചാരികൾ ഇന്ത്യൻ വസ്ത്രധാരണ രീതി അറിഞ്ഞിരിക്കേണ്ടതാണെന്നും സംഘടനകൾ സംയുക്തമായി വ്യക്തമാക്കി.
