ലക്നൗ: പ്രധാനമന്ത്രി നരേന്ദ്ര മോദിയുടെ സന്ദർശനത്തോടനുബന്ധിച്ച് അയോദ്ധ്യയിൽ സുരക്ഷ ശക്തമാക്കി പോലീസ്. അയോദ്ധ്യ സന്ദർശന വേളയിൽ 15,000 കോടി രൂപയുടെ വിവിധ പദ്ധതികൾ പ്രധാനമന്ത്രി ഉദ്ഘാടനം ചെയ്യും.
പ്രധാനമന്ത്രിയുടെ സന്ദർശനത്തിന് മുന്നോടിയായി സുരക്ഷാക്രമീകരണങ്ങൾ ശക്തമാക്കിയിട്ടുണ്ടെന്നും തീവ്രവാദ വിരുദ്ധ സ്ക്വാഡിനെയും എൻഎസ്ജി ഉദ്യോഗസ്ഥരെയും വിന്യസിച്ചതായി ലഖ്നൗ സോൺ അഡീഷണൽ ഡയറക്ടർ ജനറൽ ഓഫ് പോലീസ് പിയൂഷ് മോർദിയ വ്യക്തമാക്കി.
സുരക്ഷാക്രമീകരണങ്ങൾ ഉറപ്പാക്കാനായി പ്രധാനമന്ത്രിയുടെ റോഡ്ഷോയുടെ റിഹേഴ്സൽ ഇന്ന് നടത്തുമെന്നും അദ്ദേഹം പറഞ്ഞു. ഡ്രോണുകൾ ഉപയോഗിച്ച് എല്ലാ പ്രദേശങ്ങളും നിരീക്ഷിച്ചുവരികയാണ്. ഗതാഗത സംവിധാനം മെച്ചപ്പെടുത്തുന്നതിനുള്ള ക്രമീകരണങ്ങളും ഒരുക്കിയിട്ടുണ്ടെന്ന് അദ്ദേഹം വ്യക്തമാക്കി.
മൂന്ന് ഡിഐജി, 17 എസ്പി, 38 അഡീഷണൽ എസ്പി, 82 ഡെപ്യൂട്ടി എസ്പി, 90 ഇൻസ്പെക്ടർ, 325 സബ് ഇൻസ്പെക്ടർ, 35 വനിതാ സബ് ഇൻസ്പെക്ടർ, 2000 കോൺസ്റ്റബിൾ, 14 കമ്പനി പിഎസി, 6 കമ്പനി സിആർപിഎഫ് എന്നിവരെ സുരക്ഷയുടെ ഭാഗമായി വിന്യസിക്കും, എഡിജിപി കൂട്ടിച്ചേർത്തു. പ്രധാനമന്ത്രിയുടെ സന്ദർശനത്തിന് മുന്നോടിയായുള്ള ഒരുക്കങ്ങൾ വിലയിരുത്താനായി ഉപമുഖ്യമന്ത്രി കേശവ് പ്രസാദ് മൗര്യ മൂന്ന് ദിവസമായി അയോദ്ധ്യയിൽ ക്യാമ്പ് ചെയ്യുന്നുണ്ട്.
അയോദ്ധ്യയിലെ അടിസ്ഥാന സൗകര്യങ്ങളും കണക്റ്റിവിറ്റിയും വർദ്ധിപ്പിക്കുന്നതിനുള്ള സർക്കാരിന്റെ സുപ്രധാന നാഴികക്കല്ലായ അയോദ്ധ്യ ധാം ജംഗ്ഷൻ റെയിൽവേ സ്റ്റേഷനും പ്രധാനമന്ത്രി ഉദ്ഘാടനം ചെയ്യും. രണ്ട് അമൃത് ഭാരത് ട്രെയിനുകൾ, കൂടാതെ, രാജ്യത്തിന്റെ റെയിൽ ശൃംഖലയ്ക്ക് സംഭാവന നൽകുന്ന ആറ് പുതിയ വന്ദേ ഭാരത് ട്രെയിനുകൾ എന്നിവയും അദ്ദേഹം ഫ്ലാഗ് ഓഫ് ചെയ്യും.
പ്രധാനമന്ത്രി മോദിയുടെ അയോധ്യ സന്ദർശനത്തിൽ പുതുതായി നിർമ്മിച്ച അയോദ്ധ്യ വിമാനത്താവളത്തിന്റെ ഉദ്ഘാടനവും. ഇതോടൊപ്പം നടക്കുന്ന പൊതുപരിപാടിയിൽ 15,700 കോടിയിലധികം രൂപയുടെ വികസന പദ്ധതികളും പ്രധാനമന്ത്രി സംസ്ഥാനത്തിന് സമർപ്പിക്കും. അയോദ്ധ്യയുടെയും പരിസര പ്രദേശങ്ങളുടെയും വികസനത്തിനായി ഏകദേശം 11,100 കോടി രൂപയുടെ പദ്ധതികളും ഉത്തർപ്രദേശിലുടനീളമുള്ള മറ്റ് പദ്ധതികളുമായി ബന്ധപ്പെട്ട 4600 കോടി രൂപയുടെ പദ്ധതികളും ഇതിൽ ഉൾപ്പെടുന്നു.
കൂടാതെ, നയാ ഘട്ട് മുതൽ ലക്ഷ്മൺ ഘട്ട് വരെയുള്ള വിനോദസഞ്ചാര സൗകര്യങ്ങളുടെ വികസനവും സൗന്ദര്യവൽക്കരണവും, ദീപോത്സവം പോലുള്ള പരിപാടികൾക്കായി സന്ദർശക ഗാലറിയുടെ നിർമ്മാണം, രാം കി പെയ്ഡി മുതൽ രാജ് ഘട്ട് വരെയുള്ള തീർത്ഥാടക പാതയുടെ ബലപ്പെടുത്തലും നവീകരണവും പ്രധാനമന്ത്രി ഉദ്ഘാടനം ചെയ്യും.
Discussion about this post