കൊച്ചി: ജീവിതത്തിലെയും സിനിമയിലെയും അനുഭവങ്ങളും കഥകളും പങ്കുവെയ്ക്കാൻ യൂട്യൂബ് ചാനൽ ആരംഭിച്ച് സംവിധായകൻ ലാൽ ജോസ്. ലാൽ ജോസിന്റെ കൊച്ചുവർത്തമാനങ്ങൾ എന്ന പേരിലാണ് ഈ കഥകൾ ലാൽ ജോസ് എന്ന യൂട്യൂബ് ചാനലിലൂടെ ആസ്വാദകരിലേക്ക് എത്തുക.
ഓരോ പുതുവർഷത്തിലും അനുഭവങ്ങൾ കുറിച്ചുവെയ്ക്കാൻ ഡയറി എടുത്തുവെയ്ക്കുമെങ്കിലും ഇതുവരെ നാല് താളിനപ്പുറം കടന്നിട്ടില്ലെന്ന് ലാൽ ജോസ് പറഞ്ഞു. ഇനിയും അനുഭവങ്ങളെ അങ്ങനെ പാട്ടിന് വിടാൻ പറ്റില്ല. കുറെ വലിയ മനുഷ്യരെ, അതിലധികം നല്ല മനുഷ്യരെ കണ്ടിട്ടുണ്ട്, അറിഞ്ഞിട്ടുണ്ട്. നല്ല നല്ല സ്ഥലങ്ങളിൽ പോയി എല്ലാം മറന്നിരുന്നിട്ടുണ്ട്.
പിടിച്ചുലയ്ക്കുന്ന ഒരുപാട് കഥകൾ കേട്ടിട്ടുണ്ട്. എഴുതാൻ വയ്യാത്തതു കൊണ്ട് പറയാമെന്ന് വച്ചു. ഒരു കൊച്ചുകാമറ ഓൺ ചെയ്തുവെച്ച് അതിന്റെ കണ്ണിലേക്ക് നോക്കി ഓരോരോ കൊച്ചുവർത്തമാനങ്ങൾ… ഞാൻ കണ്ട സ്പെഷ്യലായ ചില മനുഷ്യരും അത്ഭുതപ്പെടുത്തുന്ന കാഴ്ചകളുമാണ് പ്രേക്ഷകരോട് പറയുകയെന്ന് അദ്ദേഹം പറഞ്ഞു. 10 മിനിറ്റിൽ താഴെയുളള വീഡിയോകളിലൂടെയാണ് കഥകൾ പറയുക.
നേരത്തെ സഫാരി ടിവിയിലും മറ്റ് അഭിമുഖങ്ങളിലും ലാൽ ജോസ് പങ്കുവെച്ച അനുഭവ കഥകൾ ആസ്വാദകർ ഇരുകൈയ്യും നീട്ടിയാണ് സ്വീകരിച്ചത്. നിരവധി ഹിറ്റ് സിനിമകൾ മലയാളത്തിന് സമ്മാനിച്ചിട്ടുളള സംവിധായകനാണ് ലാൽ ജോസ്.
Discussion about this post