അഗര്‍ത്തല: ത്രിപുരയില്‍ സ്വകാര്യ സര്‍വകലാശാല ബില്ലിനെതിരെ സംയുക്ത നിയമസഭാ ബഹിഷ്കരണവുമായി സി പി എമ്മും കോണ്‍ഗ്രസും. ഇരു പ്രതിപക്ഷ പാര്‍ട്ടികളും ബില്ലിനെതിരെ നിലപാട് സ്വീകരിച്ചുവെങ്കിലും ഭൂരിപക്ഷ പിന്തുണയോടെ ബില്‍ പാസാക്കാന്‍ ഭരണകക്ഷിയായ ബിജെപിക്ക് സാധിച്ചു. ഇതോടെയാണ്‌ സി പി എമ്മും കോണ്‍ഗ്രസും സംയുക്ത നിയമസഭാ ബഹിഷ്കരണവുമായി രംഗത്ത് വന്നത്.
സ്വകാര്യ സര്‍വകലാശാല ബില്‍ സെലക്ട് കമ്മിറ്റിയുടെ സൂക്ഷ്മ പരിശോധനക്ക്‌ വിടണമെന്നായിരുന്നു കോണ്‍ഗ്രസിന്റെയും സി പി എമ്മിന്റെയും ആവശ്യം. എന്നാല്‍, മതിയായ പരിശോധനകള്‍ക്കും കൂടിയാലോചനകള്‍ക്കും ശേഷമാണ്‌ ബില്‍ അവതരിപ്പിച്ചതെന്നും, പ്രതിപക്ഷത്തിന്റെ ആവശ്യം അനാവശ്യ കാലതാമസത്തിന്‌ കാരണമാകുമെന്നും കാട്ടി ബിജെപി ബില്ലിന്മേല്‍ വോട്ടെടുപ്പുമായി മുന്നോട്ട് പോകുകയായിരുന്നു.
സ്വകാര്യ സര്‍വകലാശാല ബില്‍ കാലഘട്ടത്തിന്റെ ആവശ്യമാണെന്നും തൊഴിലാളികള്‍ക്ക് പോലും ഓണ്‍ലൈനായും ഓഫ്ലൈനായും ഉന്നത വിദ്യാഭ്യാസം നേടാന്‍ ഇതിലൂടെ സാധിക്കുമെന്നും ബില്‍ അവതരിപ്പിക്കവെ ത്രിപുര മുഖ്യമന്ത്രി ഡോക്ടര്‍ മാണിക് സാഹ നിയമസഭയില്‍ പറഞ്ഞു. മാതാ ത്രിപുരസുന്ദരി ഓപ്പണ്‍ സര്‍വകലാശല പോലെയുള്ള സ്ഥാപനങ്ങള്‍ ഇത്തരത്തിലുള്ള കോഴ്സുകള്‍ വാഗ്ദാനം ചെയ്യുന്നുണ്ടെന്നും അദ്ദേഹം ചൂണ്ടിക്കാട്ടി.
ഒന്നരക്കോടി രൂപയുടെ എന്‍ഡോവ്മെന്റ് സമര്‍പ്പിക്കാന്‍ സര്‍വകലാശാല അധികൃതരോട് ആവശ്യപ്പെട്ടിട്ടുണ്ട്. സംസ്ഥാന സര്‍ക്കാരിന്‌ അടിയന്തിര ഘട്ടങ്ങളില്‍ വിനിയോഗിക്കാന്‍ പൊതുഫണ്ടും സര്‍വകലാശാലകളില്‍ നിന്ന് സ്വീകരിക്കാന്‍ ബില്ലില്‍ വ്യവസ്ഥയുണ്ടെന്നും വോട്ടെടുപ്പിന്‌ മുന്നോടിയായി ത്രിപുര മുഖ്യമന്ത്രി ഡോക്ടര്‍ സാഹ നിയമസഭയില്‍ വ്യക്തമാക്കി.
Discussion about this post