ന്യൂഡൽഹി : ദേശീയ തലസ്ഥാന മേഖലയായ ഡൽഹി എൻസിആറിലും വിവിധ ഉത്തരേന്ത്യൻ സംസ്ഥാനങ്ങളിലും ഭൂചലനം അനുഭവപ്പെട്ടു. റിക്ടർ സ്കെയിലിൽ 6.1 തീവ്രത രേഖപ്പെടുത്തിയ ഭൂചലനമാണ് അനുഭവപ്പെട്ടത്. അഫ്ഗാനിസ്ഥാനിലെ ഹിന്ദുകുഷ് മേഖലയാണ് ഭൂചലനത്തിന്റെ പ്രഭവ കേന്ദ്രം എന്നാണ് റിപ്പോർട്ട്.
കാബൂളിൽ നിന്ന് വടക്ക് കിഴക്കായി 241 കിലോമീറ്റർ അകലെയാണ് ഭൂചലനത്തിന്റെ പ്രഭവകേന്ദ്രം. ഇന്ത്യൻ സമയം ഉച്ചയ്ക്ക് 2.50 ന് ആണ് ഭൂചലനം അനുഭവപ്പെട്ടത്. തലസ്ഥാന മേഖലയിൽ ഭൂചലനം ജനങ്ങളിൽ പരിഭ്രാന്തി സൃഷ്ടിച്ചതായി ദേശീയ മാദ്ധ്യമങ്ങൾ റിപ്പോർട്ട് ചെയ്തു. ഡൽഹി എൻസിആർ മേഖലയിൽ നിരവധി പ്രദേശങ്ങളിൽ വലിയ കുലുക്കം അനുഭവപ്പെട്ടതായി റിപ്പോർട്ടുകൾ സൂചിപ്പിക്കുന്നു.
നിലവിൽ ഭൂചലനത്തെ തുടർന്ന് നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ല. കഴിഞ്ഞ നാല് മാസങ്ങൾക്കിടയിൽ റിക്ടർ സ്കെയിലിൽ ആറിനു മുകളിൽ രേഖപ്പെടുത്തിയ മൂന്നാമത്തെ ഭൂകമ്പം ആണ് അഫ്ഗാനിസ്ഥാനിൽ ഉണ്ടാകുന്നത്. കഴിഞ്ഞവർഷം ഒക്ടോബറിൽ ഉണ്ടായ ഭൂകമ്പത്തെ തുടർന്ന് വലിയ നാശനഷ്ടങ്ങളും നിരവധി ആളപായങ്ങളും അഫ്ഗാനിസ്ഥാനിൽ ഉണ്ടായിരുന്നു.
Discussion about this post