ഇന്ന് സമൂഹമാദ്ധ്യമങ്ങളിൽ സ്ഥിരമായി കാണുന്ന ഒരു കാഴ്ചയാണ് ചില ഓൺലൈൻ പേജുകൾ പല സിനിമ താരങ്ങളുടെയും മറ്റും ഫോട്ടോ ഇട്ട് ലൈക്ക് ഇരക്കുന്ന കാഴ്ചകൾ. വിദ്യാസമ്പന്നരും സാംസ്കാരിക സമ്പന്നരുമാണെന്ന് എപ്പോഴും മേനി നടിക്കുന്ന മലയാളികളിൽ ഭൂരിഭാഗവും ഈ പൈങ്കിളി കെണികളിൽ കൃത്യമായി പോയി വീഴാറുമുണ്ട്. ജനങ്ങൾക്ക് പെട്ടെന്ന് സഹതാപം തോന്നുന്ന ചിത്രങ്ങൾ ആയിരിക്കും ഇത്തരത്തിൽ ലൈക് ഇരക്കുന്നവർ കൂടുതലായും ഉപയോഗിക്കാറുള്ളത്. മറ്റുള്ളവരുടെ സ്വകാര്യതയ്ക്ക് യാതൊരു മൂല്യവും കൊടുക്കാതെ അവരുടെ ചിത്രങ്ങൾ ഉപയോഗിക്കാനും ഇവർ മടിക്കാറില്ല.
അത്തരത്തിൽ തന്റെ വ്യക്തിപരമായ ഒരു ഫോട്ടോ ദുരുപയോഗം ചെയ്ത ഒരു ഓൺലൈൻ പേജിനെതിരെ രംഗത്തെത്തിയിരിക്കുകയാണ് നടൻ നിർമ്മൽ പാലാഴി. നിർമ്മലും ഭാര്യയും ഒന്നിച്ചു നിൽക്കുന്ന ഒരു ചിത്രം അദ്ദേഹം തന്റെ ഔദ്യോഗിക ഫേസ്ബുക്ക് പേജിൽ പങ്കുവെച്ചിരുന്നു. ഈ ചിത്രമാണ് ഇപ്പോൾ ശ്യാം കലാതീർത്ഥ എന്ന ഓൺലൈൻ പേജ് പങ്കുവെച്ചിരിക്കുന്നത്. ഫാൻസ് ഒന്നുമില്ലാത്ത എനിക്ക് ലൈക്ക് കിട്ടില്ല എന്നറിയാം എന്നാലും… എന്ന ക്യാപ്ഷനോടെ ആണ് നിർമ്മൽ പാലാഴിയുടെ സ്വകാര്യ ചിത്രം ഈ ഓൺലൈൻ പേജ് പങ്കുവെച്ചിരിക്കുന്നത്. ഇതിനെതിരെ ചുട്ട മറുപടിയായി നിർമ്മൽ പാലാഴി തന്നെ ഈ പേജിൽ അഭിപ്രായം രേഖപ്പെടുത്തി. “ലൈക്ക് കിട്ടാനായി എന്നെക്കൊണ്ട് ഇങ്ങനെ ലൈക്ക് ഇരക്കിക്കാതെ സ്വന്തം വീട്ടുകാരുടെ ഫോട്ടോയിട്ട് കൂടെ സുഹൃത്തേ കഷ്ടം” എന്നാണ് നിർമ്മൽ ഈ ചിത്രത്തിന് താഴെയായി അഭിപ്രായം പങ്കുവെച്ചിരിക്കുന്നത്.
ഇത്തരം ഓൺലൈൻ പേജുകളെ പ്രോത്സാഹിപ്പിക്കരുതെന്ന സന്ദേശവുമായി നിർമ്മൽ പാലാഴി തന്നെ ഫേസ്ബുക്കിലൂടെ ഈ സംഭവം പങ്കുവയ്ക്കുകയായിരുന്നു. തന്റെ സമ്മതമില്ലാതെ തന്റെയും ഭാര്യയുടെയും ഫോട്ടോ വെച്ച് ഇങ്ങനെ അപമാനിക്കുന്ന മഞ്ഞ പത്രങ്ങളെ അടച്ചുപൂട്ടാൻ സഹായിക്കണം എന്നാണ് നിർമ്മൽ പാലാഴി തന്റെ സുഹൃത്തുക്കളോടും ആരാധകരോടും അഭ്യർത്ഥിച്ചിരിക്കുന്നത്.
Discussion about this post