തിരുവനന്തപുരം: കേരളത്തിൽ നിന്ന് അയോദ്ധ്യയിലേക്കുള്ള സ്പെഷ്യൽ ട്രെയിൻ സർവ്വീസ് നാളെ മുതൽ ആരംഭിക്കും.നാളെ വൈകീട്ട് പാലക്കാട് ഒലവക്കോട് സ്റ്റേഷനിൽ നിന്നാണ് യാത്ര ആരംഭിക്കുന്നത്. രാത്രി 7:05 നാണ് യാത്ര ആരംഭിക്കുകയെന്ന് ദക്ഷിണ റെയിൽവേ അധികൃതർ വ്യക്തമാക്കിയിരുന്നു. രാജ്യത്തിന്റെ വിവിധഭാഗങ്ങളിൽ നിന്ന് അയോദ്ധ്യ ധാം റെയിൽവേ സ്റ്റേഷനിലേക്ക് സർവീസ് ആരംഭിക്കുമെന്ന് കേന്ദ്ര റെയിൽവേ മന്ത്രാലയം അറിയിച്ചിരുന്നു. ആസ്ഥാ സ്പെഷ്യൽ ട്രെയിനിൽ 1500 പേർക്ക് യാത്ര ചെയ്യാം.
മൂന്നാംദിവസം പുലർച്ചെ മൂന്നിന് അയോദ്ധ്യയിലെത്തുന്ന ട്രെയിൻ അന്നേദിവസം വൈകിട്ട് പാലക്കാട്ടേക്ക് മടക്കയാത്രയും തുടങ്ങും. ആദ്യഘട്ടത്തിൽ ഐ.ആർ.സി.ടി.സിയുടെ ടൂറിസം ബുക്കിംഗ് വെബ്സൈറ്റിലൂടെ ഗ്രൂപ്പായാണ് ടിക്കറ്റുകൾ ബുക്ക് ചെയ്യേണ്ടത്. സ്റ്റേഷനിൽ നിന്നോ ഐ.ആർ.സി.ടി.സി ആപ്പ് മുഖേനെയോ ടിക്കറ്റ് ബുക്ക് ചെയ്യാൻ സാധിക്കില്ല
ഓരോ ട്രെയിനിലും 22 സ്ലീപ്പർ കോച്ചുകൾ ഉണ്ടാകും. തുടർന്നുള്ള ദിവസങ്ങളിൽ കോയമ്പത്തൂർ, നാഗർകോവിൽ, തിരുവനന്തപുരം പാതയിലൂടെയും കൂടുതൽ ട്രെയിൻ സർവീസുകൾ അയോദ്ധ്യയിലേക്കുണ്ടാകും
