തൃശ്ശൂർ: എടത്തുരുത്തിൽ കെഎസ്ഇബി ജീവനക്കാർ വാഴകൾ വെട്ടിനിരത്തിയതായി പരാതി. ചൂലൂർ സ്വദേശി സന്തോഷിന്റെ നേന്ത്രവാഴകളാണ് വെട്ടിനശിപ്പിച്ചത്. വലപ്പാട് കെഎസ്ഇബി സെക്ഷനിലെ കരാർ ജീവനക്കാരാണ് വാഴ വെട്ടിയതെന്ന് സന്തോഷ് പറഞ്ഞു.
ചൂലൂർ ജുമാ മസ്ജിദിന് എതിർ വശത്താണ് സന്തോഷിന്റെ കൃഷി. ഇവിടെ ടച്ചിംഗ് വെട്ടാൻ എത്തിയ വാഴകളും വെട്ടിനശിപ്പിക്കുകയായിരുന്നു. വാഴകൾ ഒന്നും തന്നെ ലൈനുകളിൽ മുട്ടിയിരുന്നില്ല. എന്നിട്ടും മതിൽ ചാടിയെത്തി വാഴകൾ നശിപ്പിച്ചുവെന്നാണ് പരാതി. കുലച്ച പത്തോളം വാഴകളാണ് വെട്ടിയത്.
കഴിഞ്ഞ ഏതാനും വർഷങ്ങളായി ഇവിടെ വാഴകൃഷി നടത്തിവരികയാണ് സന്തോഷ്. വാഴകൃഷിയിൽ സുഹൃത്തുക്കളും പങ്കാളികളാണ്. പത്ത് വർഷത്തോളമായി ഈ സ്ഥലത്ത് കൂടി പോകുന്ന ലൈനിൽ വൈദ്യുതി പ്രവർത്തിക്കുന്നില്ലെന്നാണ് സന്തോഷ് പറയുന്നത്. സംഭവത്തിൽ ജീവനക്കാർക്കെതിരെ കർശന നടപടി വേണമെന്നും സന്തോഷ് ആവശ്യപ്പെട്ടു.
Discussion about this post