തൃശൂർ: തൃശൂർ ലോക്സഭാ മണ്ഡലത്തിൽ പ്രചാരണം കൊഴുപ്പിച്ച് ബിജെപി. തൃശൂരിൽ നിന്നും ഒരു കേന്ദ്ര മന്ത്രിയെന്ന ഉറപ്പുമായാണ് തൃശൂരിൽ ചുവരെഴുത്തുകളുമായി ബിജെപി പ്രവർത്തകർ പ്രചാരണം സജീവമാക്കിയിരിക്കുന്നത്. ലോക്സഭാ മണ്ഡലത്തിൽ ഉൾപ്പെട്ട മണലൂർ നിയമസഭാ മണ്ഡലത്തിലാണ് ചുവരെഴുത്തുകൾ.
തൃശൂരിനൊരു കേന്ദ്ര മന്ത്രി, മോദിയുടെ ഗ്യാരണ്ടി എന്നിങ്ങനെയാണ് ചുവരെഴുത്തുകൾ. ദിവസങ്ങൾക്ക് മുൻപ് തന്നെ തൃശൂരിന്റെ മതിലുകളിൽ താമര വിരിഞ്ഞു തുടങ്ങിയിരുന്നു. താമരചിഹ്നം വരച്ചുകൊണ്ട് സുരേഷ് ഗോപിയാണ് പ്രചാരണ പരിപാടികൾക്ക് ബിജെപി പ്രവർത്തകർ തുടക്കം കുറിച്ചത്. മണ്ഡലത്തിൽ സ്ഥാനാർത്ഥിയെ ഔദ്യോഗികമായി പ്രഖ്യാപിച്ചിട്ടില്ല. അതിനാൽ തന്നെ താമര ചിഹ്നം മാത്രം വരച്ചുകൊണ്ടാണ് പ്രചരണത്തിന് തുടക്കം കുറിച്ചത്. കണിമംഗലം വലിയാലുക്കലിലാണ് ഉദ്ഘാടനം നടന്നത്.
‘രാജ്യമൊട്ടാകെ താമര തരംഗമാകും, അത് തൃശൂരിലും ഉണ്ടാകും. രാജ്യത്തിന്റെ വിശ്വാസം കേരളത്തിന്റെ കൂടി വിശ്വാസം ആയി മാറിയാൽ കേരളത്തിനും അതിന്റെ പങ്കുപറ്റാനാകുമെന്നും അതിന്റെ ഗുണമുണ്ടാകും’- സുരേഷ് ഗോപി പറഞ്ഞിരുന്നു.
