എറണാകുളം: തൊട്ടതെല്ലാം പൊന്നാക്കിയ സംരംഭകൻ എന്ന പേരിന് അനുയോജ്യമാണ് പോപ്പീസ് ബേബി കെയർ മാനേജിംഗ് ഡയറക്റ്ററായ ഷാജു തോമസ്. പത്രപ്രവർത്തകനായി ഔദ്യോഗിക ജീവിതം ആരംഭിച്ച അദ്ദേഹം തുണിത്തരങ്ങളുമായി ബന്ധപ്പെട്ട ലേഖനം തയ്യാറാക്കുന്നതിനായി തിരുപ്പൂർ സന്ദർശിച്ചിരുന്നു. ഇതാണ് പോപ്പീസ് ബേബി കെയർ എന്ന സ്ഥാപനത്തിന്റെ തുടക്കത്തിന് കാരണമാകുന്നത്. പത്രപ്രവർത്തകനിൽ നിന്നും സംരംഭകനിലേക്കുള്ള അദ്ദേഹത്തിൻറെ ചുവടുമാറ്റം പോപ്പീസ് ബേബി കെയർ എന്ന പേരിൽ കുട്ടികൾക്കായുള്ള ബ്രാൻഡ് സമ്മാനിച്ച് കൊണ്ടായിരുന്നു.
കേരളത്തിനും പുറത്തുമായി നൂറോളം ഔട്ട്ലെറ്റുകളുള്ള പോപ്പീസ് 20 വർഷം പൂർത്തിയാക്കുമ്പോൾ, ഓഹരി വിപണിയിലെ ലിസ്റ്റഡ് കമ്പനിയായി മാറികഴിഞ്ഞു എന്ന വാർത്തയാണ് പുറത്ത് വരുന്നത്. ഒരു ഐപിഒ പോലും നടത്താതെ എങ്ങനെയാണ് പോപ്പീസ് ഓഹരി വിപണിയിലെ ലിസ്റ്റഡ് കമ്പനിയായി മാറിയത് എന്ന സംശയം സ്വാഭാവികം.
ബോംബെ സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്യപ്പെട്ട അർച്ചന സോഫ്റ്റ് വെയർ എന്ന കമ്പനിയുടെ ഓഹരികൾ പോപ്പീസിന്റെ പ്രൊമോട്ടോർമാരായ ഷാജു തോമസും ഭാര്യ ലിന്റ.പി.ജോസും വാങ്ങി. ശേഷം, അർച്ചന സോഫ്റ്റ് വെയറിന്റെ പേരും ബിസിനസ് സ്വഭാവവും മാറ്റാൻ ബി.എസ്.ഇ യിൽ അപേക്ഷ നൽകി. പോപ്പീസ് കെയേഴ്സ് ലിമിറ്റഡ് എന്നാണ് പുതിയ പേര്. ചുരുങ്ങിയ കാലത്തിനുള്ളിൽ വലിയ നേട്ടങ്ങൾ കൈവരിച്ച പോപ്പീസിന്റെ വികസനത്തിന്റെ തുടർച്ചയായി വേണം ഓഹരി വിപണിയിലെ ഇടംപിടിക്കലിനെ കാണാൻ.
ഷാജു തോമസും ലിന്റ.പി.ജോസും പ്രൊമോട്ടർമാരായ പോപീസ് ബേബികെയർ പ്രോഡക്സ് പ്രൈവറ്റ് ലിമിറ്റഡ് 100 കോടി മുകളിൽ വിറ്റ് വരുമാനമുള്ള കമ്പനിയാണ്. ഈ കമ്പനിയെ പുതിയ കമ്പനിയിൽ ലയിപ്പിക്കാനുള്ള ശ്രമമാണ് നടത്തുന്നതെന്നാണ് അറിയുന്നത്. ഷാജു തോമസ് 12 കോടി 80 ലക്ഷം രൂപയുടെ ഷെയർ വാറണ്ടിനും അപേക്ഷ നൽകിക്കഴിഞ്ഞു. 51.15 രൂപയ്ക്കാണ് ഷാജുതോമസ് വാറണ്ട് എടുക്കുന്നത്. കഴിഞ്ഞ ജൂലൈയിൽ ഓപ്പൺ ഓഫർ വഴി വിപണിയിലെ ഷെയർ സ്വന്തമാക്കാൻ നോക്കിയിരുന്നു. അന്നുമുതൽ അർച്ചന സോഫ്റ്റ് വെയറിന്റെ വിപണി വില കുതിച്ചുയരുകയാണ്. എട്ടുമാസം കൊണ്ട് 10 രൂപ മുഖവിലയുള്ള ഷെയർ വില 100 കടന്നു.
തെക്കേ ഇന്ത്യയിൽ ധ്രുതഗതിയിൽ വളരുന്ന റീടെയിൽ ചെയിൻ ഷോപ്പുകൾ ഇപ്പോൾ പോപ്പീസിനാണ്. പുതിയ പബ്ലിക് കമ്പനിയിൽ പ്രൈവറ്റ് പ്ലേസ്മെന്റിലൂടെ പണം കണ്ടെത്തി ഇന്ത്യ ഒട്ടാകെ വളരുകയാണ് പോപ്പീസിന്റെ ലക്ഷ്യം. ഇതേക്കുറിച്ച് പ്രതികരിക്കാൻ പോപീസ് ബേബി കെയർ ഉടമകൾ തയ്യാറായില്ല. ഇന്ത്യയിലെ പ്രമുഖ ബേബി കെയർ ബ്രാൻഡ് ഫസ്റ്റ് ക്രൈ യും പബ്ലിക് ഷെയറിന് അപേക്ഷ നൽകി കാത്തിരിക്കുന്നതിനാൽ വിപണിയിലെ മത്സരം കടുക്കും എന്ന് വേണം കരുതാൻ.
Discussion about this post