തിരുവനന്തപുരം: സർക്കാർ ജീവനക്കാർക്കുള്ള ശമ്പള വിതരണം വൈകുന്നതിനെതിരെയുള്ള വിമർശനങ്ങൾ കടുക്കുന്നതിന് പിന്നാലെ കുറിപ്പുമായി മുതിർന്ന മാദ്ധ്യമപ്രവർത്തകൻ എംവി ബെന്നി. നിങ്ങൾ ജോലിക്ക് കയറിയാൽ മാസാവസാനമാണ് ശമ്പളം. എന്നാൽ, നിങ്ങൾ സർവീസിൽ നിന്നും വിരമിച്ച് അടുത്ത മാസം തന്നെ നിങ്ങൾക്ക് പെൻഷൻ കിട്ടും. അങ്ങനെ നോക്കുമ്പോൾ പെൻഷൻ കുറച്ച് വൈകിയാലും ശമ്പളം ഒരിക്കലും വൈകരുതെന്ന് അദ്ദേഹം ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റിന്റെ പൂർണരൂപം
പെൻഷൻ മുൻകൂറും ശമ്പളം പണിയെടുത്ത ശേഷവുമാണ്.
ഉദാഹരണത്തിന്, നിങ്ങൾ ജോലിയിൽ കയറിയാൽ മാസാവസാനമാണ് ശമ്പളം, കൃത്യമായി പറഞ്ഞാൽ പിറ്റേ മാസം ഒന്ന് രണ്ട് മൂന്ന് തീയതികളിൽ.
എന്നാൽ പെൻഷൻ അങ്ങനെയല്ല, സർവ്വീസിൽ നിന്നു വിരമിച്ച പിറ്റേ മാസം ഒന്നിന് തന്നെ നിങ്ങളുടെ പെൻഷൻ ഡ്യൂ ആകും. അതായത്, നിങ്ങൾ ഇടക്കുവെച്ച് തട്ടിപ്പോയാൽ സർക്കാർ മുൻകൂറായി നിങ്ങൾക്ക് തന്ന പെൻഷൻ തുക സർക്കാരിന് നഷ്ടം.
അതുകൊണ്ട് ഞാൻ പതിനഞ്ചാം തീയതിയാണ് പെൻഷൻ വാങ്ങുക. അതാകുമ്പോൾ രണ്ടുകൂട്ടർക്കും റിസ്ക് ഒരുപോലെ!
എങ്കിലും പൊതുവിൽ പെൻഷൻകാർ ഒന്നാം തീയതി തന്നെ പെൻഷൻ വാങ്ങാൻ ട്രഷറിയിൽ ഹാജരാകും. പഴയ സഹപ്രവർത്തകരെ കാണാമല്ലോ.
എല്ലാവരേയും കുറേ കണ്ടതല്ലേ, ഇനി കാണാതിരിക്കാമല്ലോ എന്നു കരുതി എന്റെ ട്രഷറി യാത്ര 15 ന് ആക്കും.
ഞാൻ പറഞ്ഞുവന്നതിന്റെ സാരമിതാണ്, ശമ്പളം ഒരുകാരണവശാലും വൈകരുത്. പെൻഷൻ അല്പം വൈകിയാലും പറഞ്ഞു നിൽക്കാം.
പക്ഷേ, പെൻഷൻകാർ വൃദ്ധജനങ്ങൾ ആയതുകൊണ്ട് പെൻഷൻ വൈകിയാൽ അവർ സർക്കാരിനെ പ്രാകും!
ജാതകത്തിൽ ഏഴരശനി വരുമ്പോഴാണ് ഇക്കാലത്തൊരാൾ ധനമന്ത്രിയാകുന്നത്!
Discussion about this post