റായ്പൂർ: ഛത്തീസ്ഗഡിൽ ബിജെപി നേതാക്കൾക്ക് നേരെ ആക്രമണം തുടർന്ന് കമ്യൂണിസ്റ്റ് ഭീകരർ. ബിജെപി പ്രാദേശിക നേതാവിനെ കൊലപ്പെടുത്തി. ബിജെപി ബിജാപൂർ കോർപ്പറേറ്റീവ് സെൽ അംഗം തിരുപ്പതി കട്‌ലയാണ് കൊല്ലപ്പെട്ടത്. സംഭവത്തിൽ പോലീസ് അന്വേഷണം ആരംഭിച്ചു.
ഇന്നലെ രാത്രിയോടെയായിരുന്നു സംഭവം. കോട്ട്‌മേഠ വനമേഖലയിൽ നിലവിൽ റോഡ് നിർമ്മാണവും മറ്റ് വികസന പ്രവർത്തനങ്ങളും പുരോഗമിക്കുകയാണ്. ഇതിന്റെ മേൽനോട്ടം വഹിക്കുന്നത് കട്‌ലയാണ്. കഴിഞ്ഞ ദിവസം വൈകീട്ടും അദ്ദേഹം ഇവിടെ അദ്ദേഹം ജോലികളിൽ മുഴുകിയിരുന്നു. എന്നാൽ ഇതിനിടെ ഇവിടെയെത്തിയ കമ്യൂണിസ്റ്റ് ഭീകര സംഘം അദ്ദേഹത്തെ തട്ടിക്കൊണ്ട് പോകുകയായിരുന്നു.
തൊഴിലാളികൾക്ക് മുൻപിൽ വച്ചായിരുന്നു സംഭവം. തൊഴിലാളികൾ തടയാൻ ശ്രമിച്ചെങ്കിലും ഫലമുണ്ടായില്ല. സ്ഥലത്ത് നിർത്തിയിട്ടിരുന്ന ജെസിബിയ്ക്ക് തീയിട്ട ശേഷമായിരുന്നു സംഘം മടങ്ങിയത്. പിന്നാലെ കട്‌ലയെ കൊലപ്പെടുത്തി മൃതദേഹം വഴിയിൽ ഉപേക്ഷിക്കുകയായിരുന്നു.
കഴിഞ്ഞ ഒരാഴ്ചയ്ക്കിടെ രണ്ടാമത്തെ ബിജെപി നേതാവിനെയാണ് കമ്യൂണിസ്റ്റ് ഭീകരർ കൊലപ്പെടുത്തുന്നത്. സംഭവത്തിൽ ശക്തമായ പ്രതിഷേധവുമായി ബിജെപി രംഗത്ത് എത്തി.
