ഗാസ: ആകാശമാർഗം ഭക്ഷണം വിതരണം ചെയ്യുന്നതിനിടെ സഹായപാക്കറ്റ് പെട്ടികൾ ദേഹത്ത് വീണ് ഗാസയിൽ അഞ്ച് മരണം. നിരവധി പേർക്ക് പരിക്കേൽക്കുകയും ചെയ്തു. പാരച്യൂട്ടിന് തകരാർ സംഭവിച്ച് വിടരാത്തതിനെ തുടർന്നാണ് അപകടം സംഭവിച്ചത്. ഗാസ സിറ്റിയിലെ ഷാതി അഭയാർത്ഥി ക്യാമ്പിൽ ഭക്ഷണത്തിനായി ക്യൂ നിന്ന ആളുകൾക്ക് മുകളിലേക്കാണ് പാരച്യൂട്ട് ചെന്ന്് വീണത്.
ഇന്നലെയാണ് അപകടം നടന്നത്. ഗാസയിൽ ആകാശമാർഗം ആഹാര സാധനങ്ങളും അവശ്യവസ്തുക്കളും വിതരണം ചെയ്യുന്നതിനിടെയാണ് അപകടം സംഭവിച്ചത്. ഭക്ഷണസാമഗ്രികൾ ഉൾപ്പെടെ നിറച്ച പെട്ടികകളാണ് പാരച്യൂട്ട് വിടരാതെ താഴേക്ക് പതിച്ചത്.
കടുത്ത ഭക്ഷ്യക്ഷാമം നേരിടുന്ന ഗാസയിൽ അമേരിക്ക ഉൾപ്പെടെയുള്ള വിവിധ രാജ്യങ്ങൾ ആകാശമാർഗം സഹായവിതരണം നടത്തുന്നുണ്ട് . ഏത് രാജ്യം ആഹാര സാധാനങ്ങൾ വിതരണം ചെയ്യുമ്പോഴാണ് അപകടം ഉണ്ടായത് എന്ന് വ്യക്തമല്ല. കടൽ വഴി സൈപ്രസിൽ നിന്ന് സഹായം എത്തിക്കുന്നത് ഈ ആഴ്ചയോടെ തുടങ്ങുമെന്ന് യൂറോപ്യൻ യൂണിയൻ അറിയിച്ചു.
