ന്യൂഡൽഹി: ലോക്‌സഭാ തിരഞ്ഞെടുപ്പ് തിയതികൾ പ്രഖ്യാപിക്കാനിരിക്കെ ജനങ്ങൾക്ക് സന്ദേശവുമായി പ്രധാനമന്ത്രി നരേന്ദ്ര മോദി. വികസിത ഭാരതം പടുത്തുയർത്താനായി തുടർന്നും ജനങ്ങളുടെ പിന്തുണ വേണമെന്ന് പ്രധാനമന്ത്രി പറഞ്ഞു. കഴിഞ്ഞ 10 വർഷങ്ങൾക്കിടെ ജനങ്ങളുടെ ജീവിതത്തിൽ വലിയ മാറ്റം കൊണ്ടുവരാൻ തങ്ങളുടെ സർക്കാരിന് കഴിഞ്ഞെന്നും പ്രധാനമന്ത്രി കൂട്ടിച്ചേർത്തു.
കഴിഞ്ഞ 10 വർഷത്തിനിടെ ജന ജീവിതത്തെ മറ്റൊരു തലത്തിലേക്ക് ഉയർത്താൻ കേന്ദ്രസർക്കാരിന് കഴിഞ്ഞു. സർക്കാരിന്റെ ദൃഢനിശ്ചയവും ആത്മാർത്ഥതുയമാണ് ഇതിലേക്ക് നയിച്ചത്. ദരിദ്രർ, കർഷകർ, യുവാക്കൾ, സ്ത്രീകൾ എന്നിവരുടെ ജീവിതത്തിൽ വലിയ മാറ്റങ്ങൾ കൊണ്ടുവരാൻ സർക്കാരിന് കഴിഞ്ഞു. പ്രധാനമന്ത്രി ആവാസ് യോജന വഴി ജനങ്ങൾക്ക് സൗജന്യ വീട് ലഭിച്ചു. വൈദ്യുതി, എൽപിജി കണക്ഷനും ലഭിച്ചു. ആയുഷ്മാൻ ഭാരത് വഴി ആളുകൾക്ക് സൗജന്യ മരുന്നും വൈദ്യസഹായവും ലഭിച്ചു. മാതൃ വന്ദന യോജനയിലൂടെ നിരവധി സ്ത്രീകൾക്കാണ് കേന്ദ്രസർക്കാർ താങ്ങായത്. ഇതെല്ലാം യാഥാർത്ഥ്യമാക്കാൻ കഴിഞ്ഞതെന്നും അദ്ദേഹം കൂട്ടിച്ചേർത്തു.
കഴിഞ്ഞ 10 വർഷക്കാലം കേന്ദ്രസർക്കാർ നടപ്പിലാക്കിയ നിർണായക തീരുമാനങ്ങളെക്കുറിച്ചും അദ്ദേഹം സന്ദേശത്തിൽ ഓർമ്മിപ്പിച്ചു. കേന്ദ്രസർക്കാർ ജിഎസ്ടി നടപ്പിലാക്കി. മുത്വലാഖ് നിരോധിച്ചു. ജമ്മു കശ്മീരിന്റെ അമിതാധികാരം എടുത്തു കളഞ്ഞു. പുതിയ പാർലമെന്റ് മന്ദിരം നിർമ്മിച്ചു. ഭീകരവാദത്തെയും കമ്യൂണിസ്റ്റ് ഭീകരവാദത്തെയും പിടിച്ചുകെട്ടിയെന്നും പ്രധാനമന്ത്രി പറഞ്ഞു.
വികസിത ഭാരതം പടുത്തുയർത്താൻ തുടർന്നും നിങ്ങളുടെ പിന്തുണ വേണം. വോട്ട് രേഖപ്പെടുത്തുന്നതിന് മുൻപായി കേന്ദ്രസർക്കാരിന്റെ ഭരണം ഓരോരുത്തരും വിലയിരുത്തണം. ഇനിയും നമ്മൾ ഒന്നിച്ച് ഭാരതത്തിനായി പ്രവർത്തിക്കുമെന്ന കാര്യത്തിൽ തനിക്ക് ആത്മവിശ്വാസം ഉണ്ടെന്നും മോദി വ്യക്തമാക്കി.
