ക്രിസ്റ്റഫർ നോളന്റെ കണ്ടിരിക്കേണ്ട സിനിമകൾ

അഭിനയിക്കുന്ന നടനേക്കാളുപരി സംവിധായകന്റെ പേരിൽ അറിയപ്പെടുന്ന സിനിമകളാണ് ക്രിസ്റ്റഫർ നോളന്റേത്. 1998ൽ പുറത്തിറങ്ങിയ ഫോളോയിംഗ് മുതൽ സിനിമാ ജീവിതത്തിൽ നോളൻ തിരുത്തിയെഴുതിയത് ചലച്ചിത്ര രംഗത്തെ ചില ക്ലിഷേകൾ കൂടിയാണ്. ഈ വർഷത്തെ ഓസ്‌കറിൽ പുരസ്‌കാരങ്ങൾ വാരിക്കൂട്ടിയ നോളൻ ചിത്രമാണ് ‘ഓപ്പൺഹൈമർ’. ഏഴ് വിഭാഗങ്ങളിലാണ് ‘ഓപ്പൺഹൈമർ’ അവാർഡുകൾ സ്വന്തമാക്കിയത്.

സിനിമാ ആസ്വാദനം എന്നത് കേവലം കാഴ്ചാനുഭവമാക്കാതെ, അതിനെ ബൌദ്ധിക തലത്തിലേക്കുയർത്തി പ്രേക്ഷകരിൽ വിസ്മയം തീർക്കുകയാണ് നോളൻ. ലോകമെമ്പാടും ആരാധകരുള്ള ക്രിസ്റ്റഫർ നോളന്റെ സിനിമകളിൽ നിർബന്ധമായും കണ്ടിരിക്കേണ്ട അഞ്ച് സിനിമകളെ നമുക്ക് വിശദമായി പരിചയപ്പെടാം.

മെമന്റോ

ക്രിസ്റ്റഫർ നോളൻ എന്ന സംവിധായകന്റെ ഏറ്റവും മികച്ച സിനിമയെന്ന് വിശേഷിപ്പിക്കപ്പെടുന്ന ചിത്രമാണ് മെമന്റോ. നോൺ ലീയർ നരേഷൻ കൊണ്ടാണ് നോളൻ പ്രേക്ഷകരെ ഞെട്ടിക്കുന്നത്. ഓർമ്മകളുടെ അടുക്കും ചിട്ടയുമില്ലാത്ത സഞ്ചാരത്തിന്റെ കഥ പറഞ്ഞ സിനിമയിൽ, നായകന്റെ റോൾ കൈകാര്യം ചെയ്തത് ഗായ് പീയേഴ്‌സ് ആയിരുന്നു. തന്റെ ഭാര്യയുടെ ഘാതകനെ തേടിയുള്ള നായകന്റെ ജീവിതം അവതരിപ്പിച്ച ചിത്രത്തിന് ഇന്ത്യയിലും റീമേക്കുണ്ടായി.

ദ പ്രസ്റ്റീജ്

2006 ൽ പുറത്തിറങ്ങിയ സിനിമ. നോളന്റെ കയ്യൊപ്പ് പതിഞ്ഞ ചിത്രമാണ് ദ പ്രസ്റ്റീജ്. സയൻസ് ഫിക്ഷനും സൈക്കോളജിക്കൽ ത്രില്ലറും ഇടകലർന്ന സിനിമ, രണ്ട് മാന്ത്രികന്മാരുടെ പരസ്പര വൈരത്തിന്റെ കഥയാണ് പറയുന്നത്. ക്രിസ്ത്യൻ ബെയ്ലും ഹ്യൂ ജാക്ക്മാനുമായിരുന്നു പ്രധാന വേഷങ്ങളിലെത്തിയത്. സബ് പ്ലോട്ടുകൾ കൊണ്ടും ദ പ്രസ്റ്റീജ് ഇപ്പോഴും ആരാധകർക്കിടയിൽ സജീവമായി ചർച്ച ചെയ്യപ്പെടുന്ന സിനിമയാണ്.

ദ ഡാർക്ക് നൈറ്റ്

ദ ഡാർക്ക് നൈറ്റ് ട്രയോളജിയിലെ രണ്ടാമത്തെ ചിത്രം. 2005ൽ പുറത്തിറങ്ങിയ ബാറ്റ്മാൻ ബിഗിൻസായിരുന്നു ഈ ട്രയോളജിയിലെ ആദ്യ ചിത്രം. ബാറ്റ്മാൻ എന്ന ലോക പ്രശസ്ത സൂപ്പർ ഹീറോയുടെ അതുവരെ കാണാത്ത നരേഷനായിരുന്നു ട്രയോളജിയിൽ കണ്ടത്. ദ ഡാർക്ക് നൈറ്റിലൂടെ ജോക്കർ എന്ന വില്ലനെ ഹീറോ പരിവേഷത്തിലേക്ക് എത്തിച്ചു നോളൻ. ഇന്നുവരെ ഇറങ്ങിയ സൂപ്പർ ഹീറോ ചിത്രങ്ങളിൽ ഏറ്റവും മികച്ചവയുടെ പട്ടികയിൽ ഉറപ്പായും ദ ഡാർക്ക് നൈറ്റുണ്ടാകും. ക്രിസ്റ്റ്യൻ ബെയിലിന്റെ ബാറ്റ്മാനും ഹീത്ത് ലെഡ്ജറുടെ ജോക്കറും ഒരിക്കലും മറക്കാത്ത അനുഭവമാക്കി മാറ്റുകയായിരുന്നു നോളൻ.

ഇൻസെപ്ഷൻ

ക്രിസ്റ്റഫർ നോളന്റെ ഏറ്റവും സങ്കീർണ്ണമായ സിനിമകളിലൊന്നാണ് ഇൻസെപ്ഷൻ. ഒന്നിലധികം കാഴ്ചകൾ ചിലപ്പോൾ ആവശ്യപ്പെടുന്ന, ഇറങ്ങി ചെല്ലുന്തോറും കൂടുതൽ അത്ഭുതമായി മാറുന്ന സിനിമയാണ് ഇൻസെപ്ഷൻ.
ലിയനാർഡോ ഡികാപ്രിയോ പ്രധാന വേഷത്തിലെത്തിയ ചിത്രം, സ്വപ്നങ്ങൾക്കുള്ളിലെ സഞ്ചാരത്തിന്റെ കഥയാണ് വിവരിക്കുന്നത്. നാല് ഓസ്‌കാറുകളാണ് ഇൻസെപ്ഷൻ എന്ന സിനിമ നേടിയത്.

ഇന്റർസ്റ്റെല്ലർ

സയൻസ് ഫിക്ഷൻ കൂട്ടത്തിൽ ഏറ്റവും മുൻപന്തിയിലുള്ള സിനിമകളിലൊന്ന്. കണ്ടാൽ മാത്രം മതിയാകില്ല ഇന്റർസ്റ്റെല്ലർ ആസ്വദിക്കാൻ. വീണ്ടും വീണ്ടും കാണാൻ തോന്നിപ്പിക്കുന്ന സിനിമ. ഓരോ കാഴ്ചയിലും പുതിയ അനുഭവം സമ്മാനിക്കുന്ന അത്ഭുതം. ചിത്രത്തിന്റെ മേക്കിംഗും ആശയവുമെല്ലാം സമാനതകളില്ലാത്തതായിരുന്നു. തീർച്ചയായും, ഏതൊരു സിനിമാ പ്രേമിയും കണ്ടിരിക്കേണ്ട സിനിമകളിലൊന്നാണ് ഇന്റർസ്റ്റെല്ലർ.