തിരുവനന്തപുരം: 14 വർഷങ്ങൾക്ക് ശേഷം ദളപതി വിജയ് കേരളത്തിൽ. വെങ്കട്ട് പ്രഭു ചിത്രം ഗോട്ടിന്റെ ചിത്രീകരണത്തിനായാണ് വിജയ് തിരുവനന്തപുരത്തെത്തിയത്. ചെന്നെയിൽ നിന്നും പുറപ്പെട്ട ചാർട്ടേർഡ് വിമാനത്തിൽ വൈകീട്ട് അഞ്ച് മണിയോടെയാണ് വിജയ് തിരുവനന്തപുരത്തെത്തിയത്.
വൻ ജനാവലിയാണ് ദളപതിയെ കാണാൻ വിമാനത്താവളത്തിൽ തടിച്ചു കൂടിയത്. ഈ മാസം 23 വരെ വിജയ് തിരുവനന്തപുരത്ത് ഉണ്ടാകുമെന്നാണ് വിവരം. ഗോട്ടിന്റെ ക്ലൈമാക്സ് രംഗങ്ങൾ ചിത്രീകരിക്കുക തിരുവനന്തപുരത്താണ്. ഗ്രീൻ ഫീൽഡ് സ്റ്റേഡിയം, വിമാനത്താവളം തുടങ്ങിയ സ്ഥലങ്ങളായിരിക്കും ലൊക്കേഷൻ.
നേരത്തെ വെങ്കട്ട് പ്രഭു ലൊക്കേഷൻ സന്ദർശിച്ചിരുന്നു. വിജയ്യുടെ കേരള സന്ദർശനത്തിന് വൻ സ്വീകരണമാണ് ഫാൻസ് ഒരുക്കിയിരിക്കുന്നത്. നഗരത്തിന്റെ പലയിടങ്ങളിലും താരത്തിന്റെ കട്ട് ഔട്ടുകളും ബാനറുകളും സ്ഥാപിച്ചിട്ടുണ്ട്. കാവലന്റെ ചിത്രീകരണത്തിനായാണ് വിജയ് അവസാനമായി കേരളത്തിലെത്തിയത്.
Discussion about this post