ചെന്നൈ : പതിനേഴാമത് ഇന്ത്യൻ പ്രീമിയർ ലീഗിന് ചെന്നൈയിൽ തുടക്കമായി. ചെന്നൈയിലെ എം എ ചിദംബരം സ്റ്റേഡിയത്തിൽ ആയിരുന്നു 2024 ഐപിഎൽ ആഘോഷങ്ങൾക്ക് തുടക്കമായത്. ഉദ്ഘാടന ചടങ്ങിൽ നിരവധി പ്രമുഖ താരങ്ങളാണ് പങ്കെടുത്തത്. സംഗീതനിശ അടക്കം വിപുലമായ പരിപാടികളാണ് ഐപിഎൽ ഉദ്ഘാടനത്തിനോടനുബന്ധിച്ച് ഉണ്ടായിരുന്നത്.
ബോളിവുഡ് താരങ്ങളായ അക്ഷയ് കുമാർ, ടൈഗർ ഷ്റോഫ് എന്നിവരുടെ നേതൃത്വത്തിലുള്ള നൃത്ത പരിപാടികൾ ഉദ്ഘാടന ചടങ്ങിൽ ഉണ്ടായിരുന്നു. സംഗീതസംവിധായകൻ എ ആർ റഹ്മാൻ, ഗായകൻ സോനു നിഗം എന്നിവർ അണിനിരന്ന സംഗീത നിശയായിരുന്നു ഉദ്ഘാടന ചടങ്ങിലെ മറ്റൊരു പ്രധാന ആകർഷണം.
പതിനേഴാമത് ഐപിഎല്ലിന്റെ ഉദ്ഘാടന മത്സരം ചെന്നൈ സൂപ്പർ കിംഗ്സും റോയൽ ചലഞ്ചേഴ്സ് ബംഗളൂരുവും തമ്മിലാണ് നടക്കുന്നത്. ഉദ്ഘാടനം മത്സരത്തിൽ ടോസ് നേടിയത് ആർ സി ബി ആയിരുന്നു. തുടർന്ന് ടീം ബാറ്റിംഗ് തിരഞ്ഞെടുത്തു. ഐപിഎല്ലിൽ മൂന്ന് തവണ ഫൈനലിൽ എത്തിയിട്ടും ഒരിക്കൽപോലും കപ്പ് ഉയർത്താൻ സാധിക്കാത്ത ആർസിബി ഇത്തവണ ടീമിന്റെ പേരിലും ലോഗോയിലും ജഴ്സിയിലും പുതിയ പരീക്ഷണങ്ങൾ നടത്തിയാണ് മത്സരങ്ങൾക്ക് ഇറങ്ങുന്നത്. 10 തവണ ഫൈനലിൽ എത്തിയിട്ടുള്ള ചെന്നൈ സൂപ്പർ കിംഗ്സ് അഞ്ചു തവണ കപ്പ് ഉയർത്തിയിട്ടുള്ള ടീമാണ്.
