ഇന്നത്തെ കാലത്ത് ഒരു ജോലി കിട്ടുക എന്നത് ഏറെ പ്രയാസകരമായ കാര്യമാണ്. ജോലി കിട്ടിയാൽ തന്നെ അതിന് മതിയായ ശമ്പളം കിട്ടുക എന്നത് അതിലും പ്രയാസമാണ്. ഇങ്ങനെയുള്ള സാഹചര്യത്തിലാണ് ജോലിക്ക് ആളെ വേണമെന്ന തരത്തിലുള്ള ഒരു പരസ്യം സാമൂഹ്യമാദ്ധ്യമങ്ങളിൽ വൈറലാകുന്നത്.
മോമോസ് കടയിൽ അസിസ്റ്റന്റിനെ വേണമെന്നു പറഞ്ഞുള്ള പരസ്യമാണ് വൈറലായിരിക്കുന്നത്. ഇത്രയും വൈറലാവാൻ എന്താണ് ആ പരസ്യത്തിൽ ഉള്ളത് എന്നല്ലേ..? കടക്കാരൻ വാഗ്ദാനം ചെയ്തിരിക്കുന്ന ശമ്പളം ആണ് ആളുകളുടെ ശ്രദ്ധയാകർഷിച്ചിട്ടുള്ളത്. 25000 രൂപയാണ് മോമോസ് കടയിലെ അസിസ്റ്റന്റിന് വാഗ്ദാനം ചെയ്തിരിക്കുന്ന ശമ്പളം. അമൃത സിംഗ് എന്ന ആളാണ് കടയിൽ വച്ചിരിക്കുന്ന പരസ്യത്തിന്റെ ചിത്രമെടുത്ത് എക്സിൽ പോസ്റ്റ് ചെയ്തിരിക്കുന്നത്.
‘ഈ ലോക്കൽ മോമോസ് ഷോപ്പിൽ ഇന്ത്യയിലെ ശരാശരി കോളേജിനേക്കാൾ മികച്ച പാക്കേജ് വാഗ്ദാനം ചെയ്യുന്നു’- അമൃത സിംഗ് എക്സിൽ കുറിച്ചു.
വളരെ പെട്ടെന്നാണ് പോസ്റ്റ് സമൂഹമാദ്ധ്യമങ്ങളിൽ വൈറലായത്. നിരവധി പേരാണ് തൊഴിലില്ലായ്മയെ കുറിച്ചും തങ്ങളുടെ ശമ്പള പ്രതിസന്ധികളെ കുറിച്ചും കമന്റുകളുമായി എത്തിയിരിക്കുന്നത്.
‘ ഇപ്പോൾ തന്നെ അപേക്ഷിക്കട്ടെ’ എന്നാണ് ചിലരുടെ കമന്റ്. ‘എല്ലാ ദിവസവും കഴിക്കാൻ മോമോസ് എന്നാണ് മറ്റൈാരാളുടെ കമന്റ്. ‘അവർ ടിസിഎസിനേക്കാൾ മികച്ച ശമ്പളം വാഗ്ദാനം ചെയ്യുന്നു’, ‘ഇത് സ്ഥലം എവിടെയാണ്’ എന്നിങ്ങനെ നിരവധി കമന്റുകൾ രേഖപ്പെടുത്തിയിട്ടുണ്ട്.
Discussion about this post