പാലക്കാട്: സംസ്ഥാനത്ത് താപനില മുന്നറിയിപ്പ് പുറപ്പെടുവിച്ച് കേന്ദ്ര കാലാവസ്ഥാ നിരീക്ഷണ കേന്ദ്രം. പാലക്കാട് ജില്ലയിൽ ഉഷ്ണതരംഗ മുന്നറിയിപ്പ് പ്രഖ്യാപിച്ചിട്ടുണ്ട്. ഇന്ന് മുതൽ ശനിയാഴ്ച്ച വരെയാണ് ജില്ലയുടെ വിവിധ പ്രദേശങ്ങളിൽ ഉഷ്ണതരംഗ മുന്നറിയിപ്പ് നൽകിയിട്ടുള്ളത്.
വരും ദിവസങ്ങളിൽ താപനില 41 ഡിഗ്രി സെൽഷ്യസ് വരെ ഉയരാനാണ് സാധ്യത. ഉഷ്ണതരംഗത്തിന് സാധ്യതയുള്ളതിനാൽ വരും ദിവസങ്ങളിൽ അതീവ ജാഗ്രത പാലിക്കണമെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. നാളെ മുതൽ ഞായർ വരെയുള്ള ദിവസങ്ങളിൽ പാലക്കാട് ജില്ലയിൽ ഉയർന്ന താപനില 41 ഡിഗ്രി സെൽഷ്യസ് വരെ ഉയരാനാണ് സാധ്യത. കൊല്ലം, തൃശൂർ ജില്ലകളിൽ 39 ഡിഗ്രി സെൽഷ്യസ് വരൈയും കണ്ണൂർ, കോഴിക്കോട് ജില്ലകളിൽ ഉയർന്ന താപനില 38 ഡിഗ്രി സെൽഷ്യസ് വരെയും ആലപ്പുഴ, പത്തനംതിട്ട, കോട്ടയം, കാസർകോട് ജില്ലകളിൽ ഉയർന്ന താപനില 37 ഡിഗ്രി സെൽഷ്യസ് വരെയും ഉയരാൻ സാധ്യതയുണ്ട്. തിരുവനന്തപുരം, എറണാകുളം, മലപ്പുറം, ജില്ലകളിൽ ഉയർന്ന താപനില 6 ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്.
സൂര്യാഘാതവും സൂര്യതാപവും ഏൽക്കാൻ സാധ്യതയുണ്ട്. സൂര്യാഘാതം മരണത്തിലേക്ക് നയിക്കാൻ വരെ സാധ്യതയുള്ളതിനാൽ താഴെ പറയുന്ന നിർദേശങ്ങൾ പാലിക്കാൻ ശ്രദ്ധിക്കണം.
പകൽ സമയത്ത് പുറത്തിറങ്ങുന്നത് പരമാവധി ഒഴിവാക്കുക.
ശരീരത്തിൽ നേരിട്ട് വെയിലേൽക്കുന്ന ജോലികളിൽ നിന്നും കായിക വിനോദങ്ങളിൽ നിന്നും പരമാവധി വിട്ടു നിൽക്കുക.
ധാരാളം വെള്ളം കുടിക്കുക.
പുറത്തിറങ്ങുമ്പോൾ കുടയും പാദരക്ഷയും ധരിക്കുക.
പുറത്തുള്ള ജോലികൾക്കിടയിൽ ഇടക്കിടെ വിശ്രമം നൽകുക.
നിർജലീകരണം ഉണ്ടാക്കുന്ന മദ്യം, ചായ, കാപ്പി, കാർബണേറ്റഡ് പാനീയങ്ങൾ എന്നിവ പകൽ സമയത്ത് പൂർണമായും ഒഴിവാക്കുക.
കിടപ്പ് രോഗികൾ, പ്രായമായവർ, ഗർഭിണികൾ, കുട്ടികൾ, ഭിന്നമശഷിക്കാർ എന്നിവർക്ക് പ്രത്യേകം കരുതൽ നൽകുക.
